Էթնիկ ու էսթետիկ. Հայկական գորգի մոդայիկ ինտերպրետացիան

Գորգային հագուստ. տարօրինա՞կ  է հնչում: Ամենևին: Եվ ավելին՝ իրականություն է: Տերյան մշակութային կենտրոնը ներկայացրեց հայկական գորգի նախշերով «Անցյալը ապագայում» խորագրով էթնո-հավաքածուն: Ցուցադրվեց մոտ 40 հագուստ, նույնքան էլ աքսեսուար: Կենտրոնի դիզայներները օգտագործել են Ջրաբերդի, Խնձորեսկի, Ամարասի տարածշրջաններին հատուկ գորգագործության զարդանախշեր: Բայց մինչև այդ «Տերյանի» դիզայներները նպաստել են, որ հայկական էթնիկ նորաձևությունը բարձրանա նաև միջազգային պոդիում:
Գունագեղ ներդաշնակություն
Էթնո մոդայի ծնունդը 1960-70-ականներին էր: Այդպես հագնվում էին հիպիներն ու իրենց վառ կերպարով հակադրվում գորշ առօրյային ու մասսայականին շաբլոնին: Նրանք կրում էին լայնափեշ, ազատ հագուստ՝ երկար շրջազգեստ, տունիկա, շարֆեր, մոկասիններ:
Էթնոհագուստը բարձր նորաձևություն բերեց Իվ Սեն Լորանը:  Հռչակավոր կուտյուրեին 70-ականներին ներշնչում էին Չինաստանի, Աֆրիկայի, Պերուի, Մարոկկոյի մշակույթները:

Էթնո ոճը մոդա վերադարձավ 1990-ականներին ու շարունակում է պահել դիրքը:

Քրիստիան Լակրուան, Ջոն Գալյանոն, Քենզոն, Վիվիեն Թեմը և մյուս աշխարհահռչակ դիզայներները իրենց երևակայությունը համադրում են ասիական, աֆրիկյան, սկանդինավյան, ամերիկյան հնդկացիների գունագեղ, ազգային հագուստին ու մեզ պարգևում են սուպերմոդայիկ լուքեր:
Մոդայիկ ու հին՝ հայկական տարազը համաշխարհային պոդիումին
Համաշխարհային նորաձևության տները վերջին տարիներին անտարբեր չեն նաև հին հայկական տարազներին ու զարդանախշերի հանդեպ:
2015-ի սկզբին ուրախացրեց Dolce & Gabbana-ն. D&G family  համաշխարհային ընտանեկան ֆոտոալբոմում ընդգրկվեց հայկական ավանդական տարազներով ընտանիքի լուսանկար:
Տերյան մշակութային կենտրոնի «Անցյալը ապագայում» ցուցադրության ամբողջ ֆոտոշարքը.

Ethnic Fashion. Գորգյան զգեստապահարան (ՖՈՏՈՇԱՐՔ)