Հենոն կարմիր է. ամռան գլխավորը տրանսֆերը կայացած է

Հայ ֆուտբոլասերը հանում է դեղին մարզաշապիկը` հագնում կարմիրը: Ամռան ամենասպասված տրանսֆերն արդեն պաշտոնական է. Հենրիխ Մխիթարյանը Մանչեսթեր Յունայթեդի ֆուտբոլիստ է: Մարզաշխարհը սա համարում է քայլ առաջ:

Բորուսիայի ֆեյսբուքյան էջում տեղադրած պաշտոնական հաղորդագրությունից րոպեներ անց բրիտանական Sky Sports հեռուստաալիքն անցավ արտահերթ թողարկման ռեժիմի:

Թվիթթերը ողողվեց Breaking news հեշթեգով. մարզական պորտալների գլխագրերում Մխիթարյանն է, նրա մարզական ցուցանիշները, ֆուտբոլային կարիերայի ճանապարհը: Երեւանից` Դոնեցկ` Դորտմունդ եւ հիմա Մանչեսթեր:
ՀԱՋՈՂՈՒԹՅՈՒՆ ԵՆՔ ՑԱՆԿԱՆՈՒՄ: ՄԵՆՔ ԿԿԱՐՈՏԵՆՔ ՔԵԶ :'(
Հենոն արդեն Մանչեսթերի ճանապարհին է. պայմանագիրը պատրաստ է, մնում է ստորագրել: Անգլիայում ժամերն են հաշվում. օդակայանում պատրաստվում են դիմավորել վերջին տարիների աշխարհի լավագույն կիսապաշտպաններից մեկին, Եվրոպայում ամենաշատ գոլային փոխանցում կատարած ֆուտբոլիստին` Հայաստանի հավաքականի ավագին: