Newmag-ը Գրքի և արվեստի ձմեռային փառատոնին կներկայացնի Սյունե Սևադայի «Արիության մետաղ» վեպը (թրեյլեր)
02/03/2025
Newmag Winter Fest-ին տեղի կունենա «Աղի թեյ» բեսթսելլերի հեղինակ Սյունե Սևադայի 3-րդ գրքի շնորհանդեսը։ Նոր, քաղաքային վեպ՝ անհայտության մեջ երջանկություն փնտրողների մասին։
Սյունե Սևադան վերադառնում է գրական ասպարեզ նոր՝ «Արիության մետաղ» վեպով: Երիտասարդ գրողը այս անգամ անդրադառնում է 1990-ականների Երևանի քաղաքային լեգենդին՝ Բժշկական համալսարանում նկարահանված ենթադրյալ տեսանյութին, որի շուրջ ծավալվում է պատումը:
Վեպում զուգահեռաբար ներկայացվում են երկու ժամանակաշրջաններ՝ 90-ականները և մեր օրերը: Գլխավոր հերոսը 28-ամյա երիտասարդ է, ով փորձում է հաղթահարել հետտրավմատիկ սթրեսն ու ապատիան: Հեղինակը քննում է սերունդների միջև կապը, անցյալի ազդեցությունն ու ցավոտ հիշողությունների հետ առերեսման խնդիրը:
«Արիության մետաղը» Սյունե Սևադայի երրորդ գիրքն է: Նախկինում նա հրատարակել է «Կախվածություն» պատմվածքների ժողովածուն (2019թ.) և «Աղի թեյ» վեպը (2022թ.): ԵՊՀ ժուռնալիստիկայի ֆակուլտետի շրջանավարտ Սևադան գրական ասպարեզ է մտել 2010 թվականին՝ իր բլոգով, որտեղ հրապարակում էր պատմվածքներ: Նրա ստեղծագործությունները թարգմանվել և տպագրվել են միջազգային հրատարակություններում:
Ինչպես «Աղի թեյը», այնպես էլ նոր վեպը հրատարակել է Newmag-ը: «Արիության մետաղ» գրքի գլխավոր հովանորը «Սպարսիս» մարկետինգային ընկերությունն է, հովանավոր՝ «Բիզնես պարկ»։
«Արիության մետաղ» գրքի շնորհանդեսը տեղի կունենա Newmag Winter Fest-ին։ Մուտքն ազատ է։
Տարածել
Սյունե Սևադա
5800 ֏
Նկարագրություն
Մնալ ցավի մե՞ջ, թե՞ դուրս գալ թեկուզ սողալով։ Անցյալը բերե՞լ ներկա՝ փորձելով լուծումներ գտնել, թե՞ փակել ու շարժվել առաջ։ Որոշ իրավիճակներում այս հարցերի պատասխանները հստակ չեն, ու թվում է՝ հուշերի խեղդող ալիքներն արդեն հեռվում են, բայց հանկարծ պարզվում է, որ դառը օրերի համառ ու սառը ցնցուղը մշտապես գլխավերևում է՝ պատրաստ փայտացնել կամ էլ... սթափեցնել։
Որտե՞ղ սկսվեց ու որտե՞ղ կավարտվի ներքին կռիվը։ Այս հարցերի պատասխաններն են փնտրում «Արիության մետաղ» վեպի հերոսները, որոնք այսօր բախվել են անցյալի ծանր փորձություններին, որոշումներին ու թուլություններին և պետք է հասկանան, թե ինչ է պետք անել ապագայի հետ։
Այս վեպը փորձում է հիշեցնել, որ ամեն ոք իր ներսում ունի արիության սեփական մետաղը, բայց թե ինչպես այն կկիրառի, ի՛ր ընտրությունն է։
Գլխավոր գործընկեր՝ «Սպարսիս» ընկերություն։
Գործընկեր՝ «Բ-պլազա»
Կարդա նաև
Տեղի ունեցավ Հերմինե Ավագյանի «Հարժեշտի աչքերը» գրքի հեռուստաշնորհանդեսը (տեսանյութ)
Ուշագրավ փաստեր «Հազարամյակների և օրերի միջով» գրքի հեղինակի Արմեն Դավթյանի մասին (տեսանյութ)
Տեղի ունեցավ Ավետ Բարսեղյանի «Հայելիս» գրքի հեռուստաշնորհանդեսը (լուսանկարներ, տեսանյութ)
Ո՞վ կհաղթի մարդու և ռոբոտի միջև պայքարում. ինչ է AI-ն անում մարդու փոխարեն ու ավելի սահուն (տեսանյութ)