Newmag֊ը ներկայացնում է Տիգրան Հայրապետյանի «Անապատի հազար տարի» գիրքը (թրեյլեր)

Առաջին երեք հատորներում հեղինակը ներկայացնում էր Հայաստանի ու տարածաշրջանի խնդիրները, աշխարհաքաղաքական կենտրոնների հավակնություններն ու Հայաստանի դերը։ Նա տալիս էր «Երկիրը ծանր վիճակից դուրս բերելու համար ի՞նչ պետք է անել» հարցի պատասխանը։  Իսկ  վերլուծությունների չորրորդ հատորում արդեն քաղաքագիտական հոդվածներ են, որոնցում հեղինակն ապշեցուցիչ ճշգրտությամբ դեռ 1990-ականներին ախտորոշել էր Հայաստանին սպառնացող ներքին ու արտաքին վտանգներն ու կանխատեսել հնարավոր աղետները:

Տիգրան Հայրապետյանի այս հոդվածներում նորանկախ Հայաստանի հիմքերին առնչվող մտահոգիչ բազմաթիվ հարցեր են՝ 1990-ականների սկզբին ձևավորված պետական կառավարման համակարգից մինչև ազատության ու պատասխանատվության համաչափ ընկալման կարևորություն: Հեղինակը վերլուծում է Հայաստանի հնարավոր հեռանկարները՝ դրանք դիտարկելով պատերազմի ու խաղաղության, ժողովրդավարության ու բռնապետության հակադրությունների համատեքստում:  

«Անապատի հազար տարի» հատորում Տիգրան Հայրապետյանը ներկայացնում է՝ «Ի՞նչ եղավ, ինչո՞ւ եղավ ու ի՞նչ պետք է անել»։ Նույնիսկ այսօր տեղի ունեցող իրադարձությունները, Հայաստանին ու Արցախին սպառնացող ներքին ու արտաքին վտանգներն ու հնարավոր աղետները ՝ նկարագրված են ամենայն մանրամասնությամբ ու զարմանալի իրատեսությամբ։ 

Գրքում տեղ են գտել 1991-ից 1999 թվականներին գրված հոդվածներ, որոնց մի մասը հրապարակվել էր հետմահու։ Հոդվածների մի մասն էլ մինչև հիմա անտիպ էին, ու ընթերցողը կկարդա առաջին անգամ։  

Քաղաքագետ և հրապարակախոս Հայրապետյանը 1990-ականներին ՀՀ Ազգային անվտանգության խորհրդի անկախ փորձագետ, քաղաքական պարբերականների խմբագիր էր։ Հիմնադրել ու ղեկավարել է «Հայաստան-Միջին Արևելք» քաղաքական և միջազգային հետազոտությունների կենտրոնը, ղեկավարել ՌԱՀՀԿ-ն։ Ակտիվ մասնակցել է Արցախյան շարժմանը։

Նրա հրապարակախոսական հոդվածները 1991-ից կանոնավոր հրապարակվել են հայկական և միջազգային մամուլում։ Տիգրան Հայրապետյանը հայտնի էր «Արթուր Օվի» գրական ծածկանունով։ Գրեթե 400 հրապարակումների հեղինակ է։ 35 տարեկանում մահացել է վրաերթից։  «Մխիթար Սեբաստացի» կրթահամալիրի գրադարանը նրա անունով է։ 

«Անապատի հազար տարի» գրքի հեռուստաշնորհանդեսը տեղի կունենա դեկտեմբերի 14-ին, «Բարի լույս» ծրագրի շրջանակաում, իսկ շնորհանդեսը՝ դեկտեմբերի 15-ին, 19:00, Common Ground սրճարան-գրախանությում։ Այս հատորը գլխավոր գործընկերը «Հայաստանի Արևելագետների» միությունն է։