[newmusic] Ծիտ Selena Gomez-ը, Միքայել Ոսկանյանի Թաթարբորակը, Passenger-ի պարզ երգը և շաբաթվա ֆավորիտը՝ OK Go

Հոբելյանական՝ 40-րդ ցանկը համընկնում է Նոյեմբերի վերջին շաբաթվա հետ, որը եղանակին համահունչ էր՝ կա՜մ արդեն ամանորյա երգեր են լույս տեսնում, կա՜մ հիմնականում մռայլ: Սակայն այս ամբողջ երգակույտի մեջ ես և Նյումեգը չէինք կարող չգտնել պոզիտիվ և լսելու ու դիտելու արժանի ստեղծագործություններ, որոնք և կներկայացվեն ստորև:
Խնդրում եմ՝ սխալ չհասկանաք, այս տեսահոլովակն ու երգը այստեղ են ոչ թե գեղարվեստական պատճառներով, այլ ուղղակի ցույց տալու համար, թե ինչ… ծիտ է (այլ բառ չգտա, ևս մեկ անգամ կներեք) դարձել Selena Gomez-ը:
[embed]https://youtu.be/cH4E_t3m3xM[/embed]
Քանի որ լատինո երաժշտությունը կրկին դառնում է դոմինանտ՝ լսելիության առումով (Despacito-ն՝ որպես վառ օրինակ), որոշեցի այստեղ ներառել նաև Mariah Carey-ի և Busta Rhymes-ի հանրահայտ հիթի՝ «I Know What You Want»-ի՝ ըստ իստ, լատինոամերիկյան տարբերակը: Համենայն դեպս երգը վատը չէ, եթե սիրահար եք, իսկ Anitta-ն նպաստում է տեսահոլովակի դիտողականությանը:
[embed]https://youtu.be/wlS6Ix7mA0w[/embed]
 
Իսկ հիմա անցնեմ ավելի լուրջ ստեղծագործություններին: SEVDALIZA-ի «ISON» ալբոմն ամիս առաջ արդեն ներկայացրել եմ: Իրանական ծագումով երգչուհին ալբոմի երգերը սկսել է մարմնացնել նաև տեսահոլովակներում: Մարմնացնել՝ նաև բառի բուն իմաստով: Այս դեպքում մնում է միայն ուրախանալ, որ Իրանում YouTube-ն արգելափակված է:
[embed]https://youtu.be/feDs1pIhTFQ[/embed]
Ուրախալի է, որ հայրենական որակյալ երաժիշտները սկսել են պարզ ու թեթև գործերի հիման վրա տեսահոլովակներ թողարկել: Պարզ ու թեթև է նաև ստեղծագործության անվանումը՝ «Թաթարբորակի»: Միքայել Ոսկանյանը շարունակում է թառը՝ ունիվերսալ գործիք դարձնելուն ուղղված գործունեությունը:
[embed]https://youtu.be/9FOUyHaJdWA[/embed]
 
Երբեմն ցանկություն է առաջանում դիտել ու լսել պարզապես բարի, չծանրաբեռնող ու հաճելի տեսահոլովակ: Թեև ինքս Passenger-ի՝ մեղմ ասած երկրպագու չեմ, սակայն «Simple Song»-ի տեսահոլովակը ստիպում է մոռանալ նախապաշտամունքներն ու ժպտալ:
[embed]https://youtu.be/6SjslBAJkJI[/embed]
 
Եվս մեկ հայրենական երգ, որն արդեն հասցրել է սիրվել համացանցում: Խոսքը լուսահոգի Էդգար Էլբակյան Կրտսերի «Լուսին» երգի մասին է, որին նոր կյանք հաղորդեց Գարիկ Պապոյանի ու Սոնա Ռուբենյանի համագործակցությունը: Գեղեցիկ «հախվերդյանական» երգ, որը միայն լուսավոր զգացողություններ է առաջացնում:
 
[embed]https://youtu.be/HKJ2Hjuz8Fc[/embed]
Շաբաթվա իմ ֆավորիտն է OK Go-ի «Obsession»-ը: Տղաները կրկին «գժական» տեսահոլովակ են նկարահանել, որտեղ օգտագործված թղթի ու տպիչների ներկի քանակությունը միայն կարելի է ենթադրել: Բացի այդ՝ երգն ինքն իրենով շատ հիթային ու հիշվող է, ինչը կրկնակի ուրախություն է պատճառում:
[embed]https://youtu.be/LgmxMuW6Fsc[/embed]