Newmag-ը հրատարակել է Արմեն Դավթյանի «Հազարամյակների և օրերի միջով» պոեզիայի ժողովածուն (թրեյլեր)

Արմեն Դավթյանը 1980-1990-ականներին խորհրդայինից անկախություն անցման շրջանի հայ պոեզիայի չսպառվող լիցքն էր, որ ոգեշնչել է ոչ միայն ընթերցողներին, այլև նրա սերնդակից հեղինակներին։ Գրողն առաջին քայլերն արել է 1980-ականների սկզբին՝ դառնալով համարձակ ու ինքնատիպ՝ թելադրելով գրական միջավայրում ճաշակ, ընդարձակելով լեզվի ու բանաստեղծական երևակայության սահմանները։

Բանաստեղծ Արմեն Դավթյանը ԵՊՀ բանասիրության ֆակուլտետի սան է, ուսանել է նաև Գեղարվեստաթատերական ինստիտուտում։ 80-ականների վերջից  խմբագիր էր «Գարուն» ամսագրում։ Աշխատել է նաև «Մունետիկ» շաբաթաթերթում, «Անդին» հանդեսում, «Նոր դպրոց» հրատարակչությունում։ Հայաստանի գրողների միության անդամ է 1987-ից: 

Հայագետ, շումերագետ, բանաստեղծ, ժամանակակից հայ բանաստեղծության ամենատպավորիչ դեմքերից մեկի՝ Արմեն Դավթյանի «Հազարամյակների և օրերի միջով» բանաստեղծությունների ժողովածուի մեջ տեղ են գտել նրա այն գործերը, որոնք մինչ այդ լույս էին տեսել «Նորավանք» և «Տեսիլներ մենախցում» ժողովածուներով։ Ընտիր երկերը հրատարակվել է Արմեն Դավթյանի ընկերների ֆինանսական աջակցությամբ։ 

Այժմ Արմեն Դավթյանն աշխատում է Բյուրականի աստղադիտարանի Պատմամշակութայինաստղագիտության բաժնում։ Վերջին տարիներին գրեթե չի ստեղծագործում, փոխարենն ուսումնասիրում է շումերներին և նրանց մշակութային ժառանգությունը։

«Շումերների «Երկրագործական ուղեցույցը» հայերեն է» գրքում Դավթյանը ուսումնասիրելով մ.թ.ա. 18-րդ դարի սեպագիր տեքստը՝ պարզաբանում է, որ հայերենն ու շումերենը ոչ թե սոսկ ընդհանրություններ ունեն, այլ նույն լեզուն են։ 

Դավթյանը գիտական 4 մենագրություն, 4  տասնյակից ավելի գիտական հոդվածների հեղինակ է։