Newmag-ն ու Yeraz Projects-ը Երազ մատենաշարով ներկայացնում են Աննա Ստարոբինեցի «Գազան դետեկտիվ» շարքի երկրորդ գիրքը (թրեյլեր)

Հեռավոր Անտառում խաղաղությունը կրկին վտանգված է։ Որսագյուղի և ոստիկանության միջև ձևավորված փխրուն դաշինքը կարող է փլուզվել ցանկացած պահի, իսկ ներկան ավելի քան անորոշ է թվում։ Այստեղ մեկ սխալ քայլը կարող է ոչ միայն խափանել հետաքննությունը, այլև վտանգել բազմաթիվ կյանքեր։

Այս անգամ գործը միայն հանցագործին բացահայտելը չէ։ Հերոսները ստիպված են փրկել կյանքեր, իրականացնել գաղտնի առաքելություն, բանակցել մարդկանց հետ և հասկանալ, թե ինչպես կարող է ամենաանսպասելի, պատահական վկան ամբողջությամբ փոխել հետաքննության ընթացքը։

Որսագյուղում բոլորի կյանքը վտանգի տակ է։ Տնային տնտեսուհու խոհանոցում հավաբնի բնակիչներին սպասվող տխրահռչակ ապագան Հավ-չորսին մղում է անհավանական հերոսության։ Ավագ Փորսուկատուն սկսում է ոչ այնքան հաճելի հետաքննություն՝ նոր գործընկերների հետ, իսկ Սարյակը մեկնում է գաղտնի առաքելության։ Միևնույն ժամանակ Ագռավ բժիշկը փորձում է փրկել կյանքեր՝ ցուցադրելով, որ երբեմն նույնիսկ ամենաանսպասելի մասնագետը կարող է վճռորոշ դեր ունենալ։

Գրքում հայտնվում են նաև նոր ու անսպասելի կերպարներ, որոնք ոչ միայն հարստացնում են պատմությունը, այլև նոր ուղղություն են տալիս իրադարձություններին։ Հեղինակը միահյուսում է դետեկտիվի լարվածությունը, արկածային պատմության արագ ընթացքն ու կենդանական աշխարհի զվարճալի տրամաբանությունը։ 

Սրամիտ երկխոսությունները, անսպասելի շրջադարձերը և անսահման հումորը պատմությունը դարձնում են հետաքրքիր ինչպես երեխաների, այնպես էլ մեծահասակների համար։ Հատկապես ուշագրավ է այն, որ հերոսները միշտ չէ, որ համապատասխանում են իրենց մասին ունեցած սովորական պատկերացումներին․ համեստ թվացող կենդանին կարող է հայտնվել ամենավտանգավոր իրադարձությունների կենտրոնում, իսկ ամենախիզախը՝ ստիպված լինել հաղթահարելու սեփական վախերը։

Գրքի ամենազվարճալի և միաժամանակ խորհրդանշական դրվագներից մեկը կապված է Կրտսեր Փորսուղի հետ, որը հանկարծ սկսում է երազել կատու լինելու մասին։ Իսկ երբ Փորսուղն է երազում կատու լինել, պարզ է դառնում, որ Հեռավոր Անտառում իրավիճակը սովորականից շատ ավելի բարդ է։

Աննա Ստարոբինեցը ժամանակակից ռուս գրող, լրագրող և սցենարիստ է։ Մեծահասակների համար ստեղծած մռայլ ֆանտաստիկ թրիլլերների և հակաուտոպիաների շնորհիվ նրան հաճախ անվանում են «ռուսական զարհուրաթագուհի»։ Սակայն երեխաների համար Ստարոբինեցը ստեղծում է բոլորովին այլ աշխարհ՝ զվարճալի, սրամիտ և արկածներով լի։

«Գազան դետեկտիվը» նրա ամենասիրելի նախագծերից է։ Շարքի գործողությունները տեղի են ունենում Հեռավոր Անտառում, որտեղ կենդանիների կյանքը ներկայացվում է դետեկտիվ պատմության, հեքիաթի և սոցիալական հումորի յուրօրինակ համադրությամբ։ Ստարոբինեցը ռուսական և եվրոպական բազմաթիվ գրական մրցանակների դափնեկիր է։ 2018 թվականին Եվրոպական գիտաֆանտաստիկայի ընկերությունը նրան ճանաչել է Եվրոպայի լավագույն գրող՝ «Եվրոկոն» մրցանակի շրջանակում։ Իսկ «Գազան դետեկտիվ» շարքի համար 2021 թվականին նա արժանացել է Էդուարդ Ուսպենսկու անվան «Մեծ հեքիաթ» մրցանակին։

«Գազան դետեկտիվ․ Խժռելու իրավունքը» գիրքը հայերեն է թարգմանել Անուշ Մուրադյանը։ Գիրքը հրատարակվում է «Երազ» մատենաշարի շրջանակում՝ «Երազ Փրոջեքթսի» հետ գործընկերությամբ։

Գիրքը հասանելի կլինի newmag.am կայքում և գրախանութներում սեպտեմբերի 1-ից։