Լույս է տեսել 20-րդ դարի մտավոր հսկաներից մեկի՝ Քլայվ Սթեյփլս Լուիսի «Խառնակչի նամակներ» գիրքը (թրեյլեր)

Քլայվ Սթեյփլս Լուիսը եղել է Օքսֆորդի համալսարանի անգլիական գրականության գիտաշխատող և դասախոս։ 1954-ին միաձայն ընտրվել է Քեմբրիջի համալսարանի միջնադարյան և վերածննդի անգլերենի ամբիոնի ղեկավար։ Գրել է ավելի քան 30 գիրք։ Նրա ստեղծագործությունները շարունակում են ամեն տարի գրավել հազարավոր նոր ընթերցողների: Նրան մեծ ճանաչում բերեցին «Զուտ քրիստոնեություն» գիրքը, որը հայերեն է թարգմանել Newmag-ը ու հիմա էլ ներկայացնում է նույն հեղինակի մեկ այլ գործ՝ «Խառնակչի նամակները»։

Մարդկային թուլությունները, փառասիրությունը, ինքնախաբեությունը և նյութապաշտությունը, բարոյական պայքարի էությունը և չարի ու բարու միջև մարդու ճիշտ ընտրությունը. Քլայվ Սթեյփլս Լուիսն այս թեմաները ներկայացրել է անսովոր և խորաթափանց տեսանկյունից։

«Խառնակչի նամակները» յուրահատուկ ստեղծագործություն է. այն կազմված է ավագ դև Խառնակչի նամակներից, որոնք նա հղում է իր անփորձ զարմիկին՝ Գարշուկին։ Խորհրդատուի դերում Խառնակիչը փորձում է ուսուցանել երիտասարդ դևին, թե ինչպես պետք է գայթակղել և մոլորեցնել Երկրի վրա ապրող մարդուն, խոչընդոտել նրա հոգևոր առաջընթացը, մոլորեցնել ու տանել մեղքի ճանապարհով։

Այս անսովոր կառուցվածքը հնարավորություն է տալիս Լուիսին անմիջականորեն ու խորը քննել մարդկային կյանքի գայթակղությունները, սխալները և բարոյական պայքարը։ Դևերի «խորհրդատվությունը» դառնում է հայելի, որտեղ ընթերցողը տեսնում է իր սեփական թուլությունները՝ փառասիրությունը, ինքնախաբեությունը, նյութապաշտությունը։ 

Գրքի ենթատեքստում ընթերցողը տեսնում է բարոյական պայքարի ճշմարիտ էությունը։ Լուիսը ցույց է տալիս, որ չարի և բարու միջև մարդու ճիշտ ընտրությունը տեղի է ունենում ոչ թե կարևոր և դրամատիկ պահերին, այլ ամենօրյա, երբեմն անտեսանելի իրավիճակներում։

Հեղինակը հեգնանքի է ենթարկում մարդկային այն թուլությունները, որոնք թվում են անմեղ, բայց կարող են հոգևոր լուրջ հետևանքներ ունենալ։ Փառասիրությունը, որը մեզ դարձնում է կախված այլոց կարծիքից, ինքնախաբեությունը, որ թույլ է տալիս արդարացնել մեր սխալները, նյութապաշտությունը, որը դարձնում է մեզ կույր իրական արժեքների հանդեպ։

«Խառնակչի նամակները» ապացուցում է Լուիսի հանճարեղությունը՝ որպես մտածող ու գրող։ Այս գիրքը տասնամյակներ շարունակ արդիական ու ազդեցիկ է մնացել, օգնել է հազարավոր ընթերցողների։

Guardian-ի մեկնաբանությամբ, «Այս գիրքը միաժամանակ փայլուն է և անկեղծորեն վեհ, իսկական հաճույք է և պետք է դառնա դասական»։

Newmag հրատարակչությունը «Հուն» մատենաշարով ներկայացնում է Քլայվ Սթեյփլս Լուիսի մոնումենտալ գործը՝ «Խառնակչի նամակները. Ավագ դևի նամակները՝ կրտսեր դևին»։ Գիրքը հրատարակվում է Մայր Աթոռ Սուրբ Էջմիածնի Հրատարակչական խորհրդի երաշխավորությամբ։ Թարգմանությունն անգլերենից՝ Աննա Դանիելյանի։

Հեռուստաշնորհանդեսը հոկտեմբերի 8-ին է, Արմենիա Հ/Ը «Բարի լույս» հաղորդման եթերում։ Գիրքը հասանելի է գրախանութներում և newmag.am կայքում։