«Բարի լույս» ծրագրում Newmag-ը ներկայացրեց միանգամից 2 նոր գիրք (տեսանյութ)

«Բրիտ Մարին գալիս է քաղաք» գրքի թարգմանիչ Աշխեն Բախչինյանի խոսքով՝ Բաքմանի հաջողության գրավականը մարդկային կյանքը ներկայացնելն է. 

«Հատկապես հիմա, երբ հնի ու նորի սահմանագծին ենք, հին մարդու համար շատ դժվար է համակերպվել նորի հետ, իսկ նորի համար զարմանալի է, թե ինչպես էր այն ժամանակ, և «հին» մարդը պետք է փորձի նորովի ընկալել, յուրացնել կամ մերժել, ինչպես անում են նրա հերոսները՝ դժվարությամբ մերժելով, բայց ի վերջո գալիս են հաշտության»: 

Ըստ Աշխեն Բախչինյանի, Բաքմանի գրքերում մեծերի ու փոքրերի, տարբեր ազգությունների, հարաբերություններն են, նրանք պետք է ավելի մոտենան, մերձենան ու հաշտվեն իրար հետ. 

«Բաքմանը շվեդ է, ապրում է Շվեդիայում։ Զարգացած հասարակություններում աստիճանաբար մարդու միայնությունն ավելի ակնառու է դառնում, մարդիկ հեռանում են իրարից, որովհետև շփման կարիք չունեն, նոր տեխնոլոգիաների շնորհիվ ոչ մեկից այլևս կախում չունեն, ու շփումը պակասում է։ Բաքմանն այս գրքերով փորձում է մարդկանց ծանոթացնել ու մերձեցնել իրար հետ»։

«Բրիտ Մարին գալիս է քաղաք» գիրքը Newmag-ի և «Բուկինիստի» երրոդ համատեղ գիրքն է։ Վեպի գլխավոր գործընկեր, Բուկինիստ ընկերության տնօրեն Խաչիկ Վարդանյանը կարծում է, որ Բաքմանի ստեղծագործությունները շատ մարդկային են, ջերմ. 

«Հողագնդի վրա ապրող տարբեր ազգությունների ու ռասաների մարդկանց մեծամասնությունը դավանում է որոշակի արժեքների: Բաքմանի այս գիրքը հենց դրա մասին է, որ պետք է դավանել ճիշտ արժեքների։ Ես ամբողջովին արդարացնում եմ հերոսուհուն՝ Բրիտ Մարիին, նա 40 տարի հավատարմորեն ծառայել է ամուսնուն, «զոհել է» կյանքը, բայց արժանացել է ամուսնու դավաճանությանը, բայց հետո ինքն իրեն գտնում է նորովի»։

Համաշխարհային մյուս բեսթսելլերի՝ Քարեն Մակմանուսի «Մեզնից մեկը վերադարձել է» եռագրության վերջին գրքի գլխավոր գործընկերը «Ոսկան Երևանցի» տպագրատուն-հրատարակչությունն է։ 

Գրքի խմբագիր Մարգարիտ Սարգսյանը, որը նաև մանկավարժ է, համարում է, որ գրքի և' հերոսներն են հետաքրքիր, և' թեման. դեռահասների հարաբերություններ, սպանություն ու դրա շուրջ ծավալվող գործողություններ.

«Թեման հետաքրքիր է, գրավիչ է, անընդհատ ուզում ես կարդալ, որ տեսնես՝ վերջում ինչ եղավ: Թվում է՝ հասար վերջին, ու պետք է ավարտվի, բայց նորից պատմությունը շարունակվում է»: 

Նրա համոզմամբ, գիրքը գրված է թեթև լեզվով, ինչն ընթերցանությունը դարձնում է հետաքրքիր:

Թարգմանիչ Աստղիկ Աթաբեկյանի hամոզմամբ, գիրքը ստիպում է մտածել, թե որքանով է հասարակությունն ուշադիր իր շրջապատի դեռահասների նատմամբ, որքանով է նրանց լսում ու հասկանում. 

«Գիրքը դեռահասների ու ծնողների համար է, բազմաշերտ է, համապատասխանում է դետեկտիվ ժանրի բոլոր կանոններին, բայց նաև մտածելու տեղիք է տալիս: Մի միտք կա չէ՞, որ բոլորս գալիս ենք մեր մանկությունից, բոլոր բարդույթները, խնդիրները»։

Ըստ Աստղիկ Աթաբեկյանի՝ շատ հանգիստ կարելի է հասկանալ պատանեկան մաքսիմալիզմը, և ընդունելու ամենահեշտ ճանապարհը, սեփական մանկությունը, պատանելությունը հիշելն է։ Գրքի ուղերձներից մեկն այն է, որ համացանցը, զրուցարանները՝ չաթերը, պետք է այնպես վերահսկել, որ լինի ի օգուտ երեխայի։