Խելքս տված արվեստին՝ սպասում եմ Winter Fest-ին /փառատոնի մշակութային ծրագիրը

Newmag Winter Fest 2025-ի բացման արարողությունը կանի Հայաստանի Սիմֆոնիկ նվագախումբը։ Սիմֆոնիկ նվագախմբի կատարումներն արդեն երրորդ անգամ են դառնում Newmag-ի փառատոնների դասական երաժշտական մեկնարկը։ Առաջին անգամ Սիմֆոնիկ նվագախումբը մասնակցեց Newmag-ի Back to School 2024-ին՝ հայտնի մուլտֆիլմերի սաունդտրեկերի դասական կատարմամբ։ Իսկ ֆրանսիական գրքի ու արվեստի փառատոնին երաժիշտները կատարեցին ազնավուրյան մեղեդիներ։

Հրատարակչությունն, ինչպես իր նախորդ փառատոններին, բեմահարթակ է տրամադրել նաև արցախցի հեղինակներին ու ստեղծագործողներին։ Արցախի շունչն ու երաժշտական հնչերանգները բեմում կներկայացնի «Արցախի ձայներ» խումբը։ Voices of Artsakh-ը ստեղծվել է 2003 թվականին։ Եվրատեսիլ միջազգային մրցույթն առաջինը Հայաստան բերեց հենց «Արցախի ձայներ» նախագծի սաներից Վլադիմիր Արզումանյանը։ 

Մանկական Եվրատեսիլի հայաստանցի ևս մեկ մասնակից՝ Միշան, նույնպես այս խմբի անդամներից էր։ Միշան նաև ռուսական հայտնի «Ձայնը» երաժշտական նախագծի մասնակիցներից է։ 2017թվականին էլ «Արցախի ձայների» անդամ Էռնա Միռը ևս մեկ հայտնի միջազգային նախագծի՝ «Նոր ալիքի» հաղթողներից է։ «Արցախի ձայները» խմբի բոլոր երգերը հայրենասիրական են, ազգային ու ներկայացնում են արցախյան կոլորիտը ու հայկական մշակույթը։

Միջազգային «Նոր ալիք 2024» երաժշտական նախագծի ևս մեկ դափնեկիր՝ Անահիտ Հակոբյանը, նույնպես կլինի Newmag Winter Fest 2025-ի բեմում։ Երգչուհին կկատարի արդեն սիրելի ու հայտնի երգեր։ Անահիտ Հակոբյանը նույն օրը, իր համերգից հետո կմասնակցի Եվրատեսիլի այս տարվա նախընտրական փուլին։

Գրքի ու արվեստի փառատոնի այս տարվա փակման արարողության ու գալա համերգի աստղը կլինի Գոռ Սուջյանը։ Երգիչը մասնակցել է նաև Newmag Winter Fest 2024-ին՝ կատարելով Ավետ Բարսեղյանի ստեղծագործությունները։

Գրքի ու արվեստի փառատոնին կլինի նաև պոեզիայի երեկո, իսկ ավելի ճիշտ՝ պոետիկ ներկայացում։ Գրող, բանաստեղծ Ավետ Բարսեղյանի առաջին՝ «Հայելիս» գրքի շնորհանդեսից հետո նրա ստեղծագործությունները կընթերցեն Նազենի Հովհաննիսյանը, Հրաչուհի Ութմազյանը, Վարշամ Գևորգյանը։

WINTER FEST 2025-Ի ԾՐԱԳԻՐԸ

Dvin Music Hall-ը փետրվարի 16-ին կվերածվի ժամանակակից արվեստի և մշակույթի մի մեծ կենտրոնի։ Այցելուներին սպասում են ցուցադրություններ ու հետաքրքիր տաղավարներ, որտեղ կարող են ծանոթանալ մեր գործընկերների աշխատանքներին, առաջարկներին։ Իսկ Ազգային գրադարանն իր ու Newmag֊ի ընթերցողների համար պատրաստել է բացառիկ արտ-ինստալացիա։ Արտ-ինստալացիայից բացի, գրադարանն իր տաղավարում բոլոր ընթերցասերների համար պատրաստել է գրական մեծ անակնկալ։

Կարդացեք նաև