Տեղի ունեցավ Անի Քոչարի «Հանձնվել չկա՛» գրքի հեռուստաշնորհանդեսը (տեսանյութ)

Արմենիա հեռուստաընկերության «Բարի լույս» հաղորդման ուղիղ եթերում տեղի ունեցավ Newmag-ի նոր գրքի շնորհանդեսը՝ ներկայացրեցինք Անի Քոչարի «Հանձնվել չկա՛» գիրքը-հուշագրություն քաղցկեղը հաղթահարելու մասին: Այն հայ կնոջ պատմություն է վախի, դժվարությունների ու ամենամեծ հաղթանակի մասին:

2018 թվականին լրագրող, մոդել, խմբագիր Անի Քոչարի մոտ հայտնաբերվում է արյան քաղցկեղ, ամենածանր տեսակը: Անի Քոչարն անկեղծանում է՝ ամենաշոկայինը հենց դարձավ հիվանդության ախտորոշման փուլը. «Սկսվում է բուժման, ապաքինման դժվար փուլը: Մենք ունենք բարդույթ, մեր հիվանդությունների, դժվարությունների մասին չբարձրաձայնել: Կամ էլ ներկայացնում են շահեկան լույսի ներքո: Մարդ կա բլոգ է վարում: Ես չափազանց վատ էի, որ կարողանայի այդ փուլում բլոգ վարել, բայց երբ մի քիչ ոտքի կանգնեցի, սկսեցի փոքրիկ նշումներ անել ինձ համար»:

Մենք ունենք բարդույթ, մեր հիվանդությունների, դժվարությունների մասին չբարձրաձայնել: Կամ էլ ներկայացնում են շահեկան լույսի ներքո:

Հայաստանն օնկոլոգիական հիվանդությունների մեծ տարածում ունեցող երկների մեջ է: Գրքի հեղինակն ապաքինմանը զուգահեռ մտածում էր հենց այդ մասին.  ինչ անել, որ իր պատմութունն օգնի նաև ուրիշներին: Անգիտակից, դժվար, մորֆինովլի փուլը հաղթահարելուց հետո, Անին որոշում է օրագիր վարել ու նկարագրել հիվանդության հայտնաբերման, խորացման ու բուժման ամբողջ ընթացքը՝ առանց պաթոսի, առանց դրամատիկ զեղումների: Անին հիշում է՝ նշումներ կատարում էր իրական ու վավերագրական ճշգրտությամբ. «Այդ ժամանակ նամակ ստացա  Արտակ Ալեքսանյանից, որ գիրք գրեմ: Նման զուգադիպություն հազվադեպ է լինում: Երբ նոթագրություն էի անում, Արտակը գրեց, հասկացա, որ ուրեմն պատահական չէ, ճիշտ ուղղու վրա եմ»:

Անգիտակից, դժվար, մորֆինովլի փուլը հաղթահարելուց հետո, Անին որոշում է օրագիր վարել ու նկարագրել հիվանդության հայտնաբերման, խորացման ու բուժման ամբողջ ընթացքը՝ առանց պաթոսի, առանց դրամատիկ զեղումների:

Սա գիրք-վերադարձ է, Անի Քոչարի վերադարձը կյանք ու վերածնունդը: Վավերագրություն Հիվանդության ամբողջ ընթացքում մեկ րոպե անգամ չհանձնվելու,  հաղթելու մասին: Անի խորհուրդը՝ չհանձնվել ո՛չ մի դեպքում. «Հենց այս պահին քաղցկեղի դեմ պայքարում  է իմ մորաքույրը, իրեն էլ եմ ասել, բոլորին եմ ասում, չհանձվել, չնայած, ինչ են ասում բժիշկները, մարտահրավեր նետել այս հիվանդությանը: երբ հանձնվում ես, օրգանիզմում տեղի են ունենում պրոցեսներ, որ նույնիսկ բուժումն արդյունք չի տալիս»:

Հայաստանում այս հիվանդությանը բախվում են տասնյակ հազարավոր ընտանիքներ: Անիի ընտանիքը բացառութուն չէր, տարիներ առաջ քաղցկեղի պատճառով կորցրել էին քրոջ փոքրիկին: Անի Քոչարի գիրքը նվիրվում է նրան՝ փոքրիկ Մանեին. «Ունենք այդ ցավը: Քույրիկիս հավատն էի ուզում վերականգնել: Ինձ պատրաստում էին, որ որդուս էլ պատրաստեմ, բայց ես ուզում էի հաղթել ոչ միայն, որ ապրել էի ուզում, այլ որ մեր ընտանիքի հավատն ու հույսը վերադարձնեի»:

Ինձ պատրաստում էին, որ որդուս էլ պատրաստեմ, բայց ես ուզում էի հաղթել ոչ միայն, որ ապրել էի ուզում, այլ որ մեր ընտանիքի հավատն ու հույսը վերադարձնեի:

Անի Քոչարի հարազատ քույրերը, այսօր արդեն հաղթանակած ու շունչ քաշած՝ տեսակապով միանում են քրոջ գրքի շնորհանդեսին: Գիրք, որն ապացուցում ու վավերացնում է՝ Անին հաղթահարել է դժվար հիվանդությունը: «Հանձնվել չկա՛» գրքի խմբագիր Հասմիկ Սիմոնյանը խոսոտավանում է՝ գիրքը խմբագրել է դադարներով: Հուզվում էր, վերապրում ամեն մի նկարագրությունը. «Անարցունք կարդալ հնարավոր չէ: Իմ ընտանիքում էլ կա նման պատմություն, փշաքաղվում էի, ցավոտ էր շատ: Դժվար է ծանր թեմա վերցնել ու թեթև մատուցել»:

Որպեսզի Newmag հրատարակչության ու Անի Քոչարի մտահղացումը՝ գրքի լույս ընծայումն իրականություն դառնա, աջակցեց  գործարար Մուշեղ Ավետիսյանը: Ըստ նրա, կարևորը հենց գրքի վերնագիրն է, որը նաև ուղերձ է՝ հանձնվել չկա՛ . «Կարևոր  ուղերձը հենց չհանձնվելն է: Միայն քաղցկեղը չէ, տարբեր դժվարություններ ենք ունենում: Անգամ փոքր դժվարությունների ժամանակ հանձնվում ենք, իսկ սա ուղերձ է»:

Կարևոր  ուղերձը հենց չհանձնվելն է: Միայն քաղցկեղը չէ, տարբեր դժվարություններ ենք ունենում: Անգամ փոքր դժվարությունների ժամանակ հանձնվում ենք, իսկ սա ուղերձ է:

Անին հաճախ է հիշում, որ նույնիսկ ընկերներից ու հարազատներից հեռու գտնվելը չի խոչնդոտել, որ միշտ կապի մեջ լինի նրանց հետ: Տեսազանգերը, նամակներն ու ոգեշնչող խոսքերը երբեք չեն դադարել: Այդ բարդ փուլում մշտապես կապի մեջ է եղել գեղեցկուհի Գոհար Հարությունյանի հետ. «Երբ իմացա, մեկ ամիս չէի գրում, խուճապի էի մատնվել: Բայց Անիի հետ զրուցելուց հետո,  գտա ուժ, բազում հարցերի պատասխաններ տվեց նա: Հիմա էլ նա իր օրինակով շատ մարդկանց է օգնում հաղթահարել վախը»:

«Հանձնվել չկա՛» հուշագրությունը Newmag հրատարակչության երկրորդ բժշկական թեմայով գիրքն է: Գլխավոր խմբագիր Գնել Նալբանդյանը ներկայացնում է, թե ինչու է հրատարակչությունն այդքան կարևորում առողջությանն ու հիվանդությունները հաղթահարելուն նվիրված գրականությունը. «Newmag-ի ուղերձը` դիագնոզը դատավճիռ չէ: Շատ բան բժիշկների ձեռքին է, շատ բան մարդու ձեռքին է: Հեշտ էր ընկնել տվայտանքների գիրկը, սենիտմենտալ, հնդկական պատմութուն մեզ պետք չէր: Հումքը կար, Անին գրառումներ արել էր, մնում էր պատմությունը մատուցվեր առանց խղճահարության»:

Սերն ապրեցնում է, սերն էր, որ ստիպեց չհանձնվել: Newmag-ի նոր գիրքը հաղթող կնոջ պատմություն է:

Հիմա, հետ նայելով անցած բարդ ու դժվար երկու տարիներին, հիվանդությունը հաղթահարած Անի Քոչարը վստահ ասում է, սերն ապրեցնում է, սերն էր, որ ստիպեց չհանձնվել: Newmag-ի նոր գիրքը հաղթող կնոջ պատմություն է: