Երբ լուրերն արդեն չափից շատ են. ինչպե՞ս սպառել ու մարսել օրվա հիմնական լուրերը

Խոսում են այդ մասին աշխատավայրում և ընտանիքի անդամների, երեխաների, նույնիսկ լոգարանում՝ իրենք իրենց հետ: Լուրերը պաշարել են մարդկանց ուղեղը, աղտոտում են ցանկացած միտք ու քննարկում, խառնվում են մարդկանց հարաբերությունների մեջ, ուղղակի ստիպում են մարդկանց վիճել հարցերի շուրջ, որոնց մասին վիճողները որևէ տեղեկություն իրականում չունեն: Լուրերը մարդկանց ստիպում են պատասխանատվություն զգալ աշխարհի բոլոր խնդիրների համար, որոնց մասին, սակայն, դրանից 5 րոպե առաջ որևէ պատկերացում անգամ չունեին:
Եվ ահա, 5 րոպե անց, նրանք կրկին վիճում են ու մտահոգվում, քանի որ մոտ 10 կիլոգրամ սարսափազդու լուրեր են ստացել իրենց հեռախոսներում:

• Իսկ լուրերը, սովորաբար, այնքան սարսափելի են, որ պատում են մարդկանց ուղեղը լանչի սեղանին և զբոսայգում քայլելիս: Մարդիկ մտածում են. «Ինչո՞ւ է տրամադրությունս ընկել, չգիտեմ, բայց ինչ-որ բան անհանգստացնում է ինձ»: Եվ դրա համար շրջապատող ամբողջ աշխարհը՝ ծաղիկները, թռչունները, նույնիսկ երեխաները, ամեն ինչ շրջանցում է լուր սպառողին վատ տրամադրության պատճառով: Իսկ թե որտեղից է գալիս այդ ամենը, որն է դրա պատճառը, մարդիկ այլևս չեն էլ մտորում:


• Օրը լուրերով մի սկսեք:  Լուրերով արթնանալը 100%-ով ապահովելու է ձեր վատ տրամադրությունը ամբողջ օրվա ընթացքում: Դիմացեք գոնե մեկ ժամ: Վայելեք առավոտյան սուրճը և նախաճաշը, նախքան առօրյա ռեժիմի մեջ մտնելը:


• Ընտրեք լավ փաթեթավորված լուրերը: Այս դեպքում դուք ստիպված չեք լինի կարդալ 34 միանման հոդված ահաբեկչական վերջին հարձակման, քաղաքական սկանդալի կամ շոու-բիզնեսի ինչ-որ աստղի մասին: Բացի այդ, լուրերի կարգավորված սպառումը կանխում է էմոցիոնալ որևէ կոնկրետ դաշտում գերի մնալը:


• Մի՛ սպառեք լուրերը դրանց մասին մեկնաբանությամբ: Օրինակ, կառավարության քաղաքականության փոփոխությունը լուր է, ինչ-որ մեկի կարծիքը այդ փոփոխության մասին՝ ոչ: Մեկ ուրիշի կարծիքը կարծիք արտահայտողի կարծիքի վերաբերյալ՝ ընդհանրապես լուր չէ: Եվ այսպես շարունակ: Կարծիքը որևէ կապ չունի լուրի հետ: Բայց, եթե Հնդկաստանի պահուստային բանկի տնօրենը արձագանքում է արժեզրկմանը, դա լուր է, մյուս կողմից, այդ նույն մարդու արձագանքը հնդկական ֆիլմերին՝ ոչ:


• Եթե ցանկանում եք սպառել լուրերը որպես օգտակար գործ, որն ունի սոցիալական որոշակի արժեք, ապա լուրերի ճնշող մեծամասնությունը ձեզ ընդհանրապես չի օգնի: ԱՄՆ-ում կամ Հունաստանում գործազրկության մասին վերլուծությունները կապ չունեն ձեր համայնքի հետ: Հեռանալով հեռուստաալիքների, համացանցի, նույնիսկ տպագիր մամուլի ներկայացվող պատմություններից՝ կարող եք զբաղվել օգտակար գործով՝ սպառեք լուրեր, որոնք առնչվում են ձեր համայնքին և որոնք օգնում են ձեզ   ավելի մոտենալ տեղական խնդիրներին: Ինչպե՞ս: Շարունակեմ...

---

Լրատվության մասին կարդացեք նաև.

• Երկու տեսակի աշխարհայացք. կարդալ լա՞վ, թե՞ վատ լուրեր


• Անդրեյ Լոշակ. Մարդկանց լավ լուրեր են պետք


• Հրատապ լուրեր. 10 ֆիլմ լրագրողների մասին

---

• Ինչպես մրգերի ու բանջարեղենի դեպքում, լուրերի սպառումը տեղական մակարդակում ավելի օգտակար է: Լուրերը միայն ինֆորմացիա չեն, շատ ավելին են: Դրանք կարող ենք ձեզ դարձնել ավելի լավ քաղաքացի: Սպառեք տեղական լուրեր:


• Ազատորեն հրաժարվեք առօրյա կյանքի այն բաղադրիչներից, որոնցով հետաքրքրված չեք: Դուք ճնշում կզգաք՝ անպայման կարդալ 6 հազար բառանոց տեքստեր Բրեքսիթի կամ Հունաստանի ճգնաժամի մասին, բայց դուք պարտավոր չեք դա անել: Լուրերն ընտրեք խելամտորեն, խորը ուսումնասիրեք, քննադատողաբար մտածեք: Մի խոսքով, ճնշված մի զգացեք, երբ ստիպված եք որևէ հարցի վերաբերյալ կարծիք հայտնել: Դուք բոլորովին պարտավոր չեք դա անել:


• Կարդացեք մեկ հոդված, բայց ամբողջությամբ: Շատ ավելի օգտակար է կարդալ մեկ թերթի մեկ հոդված, քան սոցցանցում հետևել տարբեր վերնագրերի ու կարդալ այն, ինչն ամենաշատն են հավանել ձեր ընկերները:


• Ֆիզիկապես անհնար է մանրամասն տեղեկություն ստանալ բոլոր լուրերի վերաբերյալ: Ընտրեք մեկը կամ երկուսը, որոնք ձեզ իսկապես հետաքրքրում են և ուսումնասիրեք միայն դրանք: Կարդացեք գրքեր, դիտեք ֆիլմեր: Երբ մեկ կոնկրետ թեմայի շուրջ խորը գիտելիքներ ունենաք, կկարողանանք ավելի լայն պատկերացում կազմել նաև մյուս հարցերի վերաբերյալ:


• Օրվա ընթացքում հավաքեք հետաքրքիր հղումներ և շաբաթվա մեջ անդրադարձեք դրանց: Կարդացեք մի քանիսը, մյուսներից հրաժարվեք:

Եվ ամենակարևորը, ազնիվ ու հարգանքով վերաբերվեք ձեր ուղեղին: Ճիշտ այնպես, ինչպես կվերաբերվեք ձեր տանը: Կառավարեք այն, ինչ ներս եք թողնում: Ձեր ուղեղը ունի հնարավորության սահմաններ: Ծանրաբեռնեք ձեզ ուղեղին արժանի տեղեկություններով:

LIVEMINT