JOIN SIGNATURE CLUB 2027JOIN SIGNATURE CLUB 2027JOIN SIGNATURE CLUB 2027JOIN SIGNATURE CLUB 2027JOIN SIGNATURE CLUB 2027JOIN SIGNATURE CLUB 2027JOIN SIGNATURE CLUB 2027JOIN SIGNATURE CLUB 2027JOIN SIGNATURE CLUB 2027JOIN SIGNATURE CLUB 2027
Գլխավոր Լուրեր

Պե՞տք է, որ պետությունը զինծառայողին ծխախոտ տրամադ

Պե՞տք է, որ պետությունը զինծառայողին ծխախոտ տրամադրի

Պաշտպանության նախարարության պարենային ապահովման չափաքանակներից հանվում է ծխախոտը: Այս որոշման պատճառը Հայաստանի ստորագրած «Ծխախոտի դեմ պայքարի» Առողջապահության համաշխարհային կազմակերպության շրջանակային կոնվենցիան է և «Ծխախոտի դեմ պայքարի» պետական ծրագիրը: Բացի այդ` հաշվի է առնվել Զինված ուժերում ծխելու դեմ պայքարը` մասնավորապես «Առողջ զինվոր` առանց ծխախոտի» ծրագիրը:
Այս որոշման նախագիծը վերաբերում է պայմանագրային զինծառայողներին, ժամկետային զինծառայողներին 2008-ից ի վեր ծխախոտ չի տրամադրվում, բայց հատկացվում է գումար, կամ քաղցրավենիք` մարտական դիրքերում: Նույն այս որոշումով նախատեսվում է պայմանագրային զինծառայողների համար` օրը 20 գլանակ ծխախոտի և լուցկու փոխարեն կհատկացվի փող:
Ծխող մարդուն ռացիոնալ հիմնավորումներով, «չի կարելի»-ներով, խնդրանքով կամ պահանջով սիգարետից կտրելու խոսակցությունները միշտ անփառունակ վախճան են ունենում: Կլսի, կլսի ու կշտապի ծխելու: Միայն ծխող մարդը գիտի, թե ինչ է ծխախոտ չունենալը: Կարող ես Ազատության հրապարակում հացադուլ անել ամսով ու դիմանալ, կարող ես դիմանալ ծարավին, բայց չծխել չես կարող: Հացի ու ջրի համար կեսգիշերին փողոց դուրս չեն գալիս, ծխախոտի համար` դեգերում են գիշերային կրպակների մոտ: Հետևաբար` ճիշտ չէ զինծառայողին ծխախոտից զրկելը, հատկապես առողջ ապրելակերպ սկսելու հիմնավորմամբ:
Զինծառայողներին ծխախոտ չտրամադրելը դեռեւս չի նշանակում, որ նրանք կդադարեցնեն ծխելը: Ծխողը ծխում է` անկախ նրանից` ծխախոտ ունի՞, թե՞ ոչ: Էմբարգոներով ծխելու դեմ չեն պայքարում: Զինծառայողներին ծխախոտից զրկելը լրացուցիչ սոցիալական ու չհիմնավորված լարվածություն է զինծառայողի համար: Մարդը չգիտի` մարտական հերթապահությո՞ւն իրականացնի, թե՞ գնա ծխախոտ փնտրելու: Թեկուզ հակառակորդի դիրքեր: Գուցե ավելանան գողությունները կամ դասալքությունը:
Բացի այդ` ծխախոտ չտրամադրելը լրացուցիչ բեռ է զինվորի ծնողի համար: Մեկ է` զինծառայողներին տրվող ծխախոտի գումարը չի կարող հերիքել մեկ ամիս ծխախոտ գնելուն: Բանակում ծխախոտը վերջանում է ավելի արագ, քան հակաբիոտիկները` գրիպային համաճարակի ժամանակ: Ստիպված զինծառայողների ծնողներն են գնելու ուղարկելու բանակ: Զինվորական առանց այն էլ ծախսատար կապոցներում կավելանա նաեւ ծխախոտը: Չունեվոր զինվորն էլ կծխի ուրիշի ծխած սիգարետի ավելցուկը:

Բայց պե՞տք է, որ պետությունը զինծառայողին ծխախոտ տրամադրի


Իրականում` ոչ: Ոչ, որովհետեւ դիքերում ծխելը հաճախ կյանք է արժենում զինծառայողի համար` դիրքապահին դարձնելով հակառակորդի դիպուկահարի թիրախ: Դիրքում ծխելը խստիվ արգելվում է, բայց ծխող զինծառայողները, հատկապես պայմանագրայինները, հաճախ այդ կենսական կանոնը չեն պահպանում, ու դիրքերում ավելանում են զոհերը, որոնք կարող էինք չունենալ:
Պետությունը չպետք է զինծառայողին ծխախոտ տրամադրի, որովհետեւ դրանով խրախուսում է ծխելը: Ծխող տղամարդկանց մի հսկայական մաս ծխել սկսում է հենց բանակում: Մի բան է, որ ծխելու պայմաններ չկան, մեկ այլ բան է, որ ամեն օր մի տուփ ծխախոտ ես ստանում, ու այն քեզ պետք չէ: Մեկ օր պետք չէ, երկու օր, երրորդ օրը սկսում է պետք գալ: Հետեւաբար պետությունը ծխախոտը չպետք է հասցնի իրեն պաշտպանող զինվորներին:


[Իրականում` ոչ]



Պետությունը չպետք է ծխախոտ տրամադրի, որովհետեւ այդ ծխախոտը առանց ֆիլտրի է, շուկայում եղած ամենաէժան ու անորակ ծխախոտից էլ վատը` ախավելային թութունով: Յուրօրինակ գարշահոտություն տարածող ու եղունգները դեղնացնող այդ ծխաթույնը նույնիսկ մոլի ծխողներն են վաճառում անճարներին եւ ֆիլտրով ծխախոտ գնում: Հիմա ծխողները հնարավորություն ունեն միանգամից գումարը վերցնել ու գնալ գնել այն, ինչ ուզում են` առանց պարտադրանքի:
Բացի այդ` բոլորը ստանում են իրենց ծխախոտի չափաբաժինը: Ծխողը ծխում է իր բաժինը, չծխողը կոտակում է անիմաստ տուփերի կույտ: Ի՞նչ պետք է անի: Պարզ է, որ կամ պետք է նվիրի ծխող ընկերներին, կամ վաճառի` ներսում ու դրսում: Երբ պետությունը զինծառայողին ծխախոտ է տրամադրում անհեթեթ միջադեպերը` քրեական հետեւանքներով, ավելանում են:

Հիմա` պետությունը պե՞տք է զինծառայողին ծխախոտ տրամադրի


Եվս մեկ անգամ` ոչ: Եթե ծխելը վտանգավոր է առողջության համար, ուրեմն իր զինվորին ծխախոտ տրամադրող պետությունը զբաղված է իր իսկ պաշտպաններին գիտակցված թունավորելով, առողջազրկելով, աստիճանաբար սպանելով: Այդ սպանությունը զանգվածային է եւ նպատակային: Սեփական զինվորներին բանակում ծխախոտով սպանեը պետական քաղաքականության վերածվում: Եթե յուրաքանչյուր զինծառայողի ծխախոտ ես տրամադրում, ուրեմն պեսիմիստական կանխավարկած ունես, որ զինվորդ անպայման ծխող է, թուլակամ, թմրանյութից կախվածություն ունեցող, մարզումները անտեսող, անառողջ, սեփական ապագայի վրա խաչ քաշած:
Պետությունը չպետք է զինծառայողներին ծխախոտ տրամադրի, որովհետեւ հայկական բանակի զինվորի առողջությունը Հայաստանինն է եւ նրա ապագա ընտանիքինը, նրա ծնելիք երեխաների առողջության գրավականը:
Եվ զարմանալի է ոչ թե այն, որ կառավարությունը որոշում է զինծառայողին ծխախոտ չտրամադրել, այլ այն, որ մինչեւ հիմա բանակին ծխախոտ է մատակարարվել: Առաջին համաշխարհային պատերազմի ժամանակ զինվորին ծխախոտ հատկացնելը հասկանալի էր: Երկրորդ աշխարհամարտին` դեռ հասկանալի էր: Բայց 21 րդ դարում ոչ միայն անհասկանալի է, այլև անընդունելի է, պախարակելի եւ ամոթալի:

Տարածել