Թրամփի առաջին պարտությունն ու դեմոկրատների առաջին ապտակը հանրապետականներին

Թրամփի առաջին պարտությունն ու դեմոկրատների առաջին ապտակը հանրապետականներին

Ռեյգանին ու Քլինթոնին հաջողվեց առաջին անհաջողությունից հետո ուշքի գալ ու հաջողության հասնել: Իսկ ի՞նչ է սպասվում Թրամփին:

Հանրապետականները որոշեցին հանել Կոնգրեսի քվեարկությանը ներկայացրած առողջապահության բարեփոխումների նախագիծը, որն ուղղված էր Obamacare-ի դեմ:

Հարձակում՝ աջ ու ձախից

7 տարիների ընթացքում հանրապետականների դժգոհությունը 44-րդ ԱՄՆ նախագահի առողջապահական բարեփոխումներից չմեղմվեց. ամեն անգամ նրանք դեմ էին քվեարկում, ու ամեն անգամ Օբաման ստիպված էր լինում վետո դնել նրանց որոշմանը: Երբ նախագահական ընտրություններում հաղթեց Թրամփը, բոլորի համար պարզ էր` հանրապետականների առաջին հարվածն ուղղվելու է Obamacare-ին: Թրամփն այդքան էլ հետաքրքրված չէր Obamacare-ով, նրա առաջին նպատակը Մեքսիկայի հետ պատի կառուցումն էր, երկրորդը՝ հարկային դաշտի բարեփոխումը: Սակայն Թրամփին համոզեցին, որ հարկային բարեփոխումը դժվար կլինի իրականացնել՝ առանց Obamacare-ի սահմանափակումների: Առավել ևս, որ դա կբերի բյուջեի պակասուրդի կրճատմանը: Ու Թրամփը համաձայնեց:

ԱՄՆ Կոնգրեսի Ներկայացուցիչների պալատի խոսնակ Փոլ Ռայանը կազմեց օրենքի նոր նախագիծ, որը կարող էր հալած յուղի պես անցնել Ներկայացուցիչների պալատով, Սենատով և հայտնվել Թրամփի սեղանին՝ հաստատաման համար: Սակայն ամեն ինչ չէ, որ ծրագրածի պես եղավ:

Առաջին օրից նախագիծը դարձավ թե՛ աջերի, թե՛ ձախերի թիրախ: Հասկանալի էր՝ դեմոկրատներն այդքան էլ հեշտությամբ չէին համաձայնի «քար գցել» իրենց ծրագրի վրա, որի համար աշխատել էին ավելի քան 5 տարի, որը համարվում էր Օբամայի միակ այցեքարտը: Թույլ տալ չեղյալ համարել Obamacare-ը, նշանակում էր հօդս ցնդեցնել Օբամայի թողած միակ ժառանգության վրա:

Ու դեմոկրատներն աղաղակեցին՝ չեղյալ համարել Obamacare-ը, նշանակում էր առնվազն 10 տարի 25 մլն ամերիկացու զրկել բժկական ապահովագրությունից: Ու ամեն անգամ առիթը բաց չէին թողնում ՝ հիշեցնելու այս թիվը:


Թրամփ & CO-ի մասին կարդացեք`


Թրամփը սպասում էր դեմոկրատների հարվածին, սակայն՝ ոչ յուրայիններից: Նա անակնկալի եկավ, երբ իր դեմ դուրս եկան Freedom-ի պահպանողական կոնգրեսականները: Նրանք հրաժարվեցին կողմ քվեարկել օրինագծին՝ պատճառաբանելով, թե Փոլ Ռայանի առաջարկները բավարար չեն: Պահպանողական կոնգրեսականներին համոզելու գործին անցան Թրամփի բոլոր համակիրները: Բանակցություններին միացավ նաև Թրամփը, սակայն ընտրեց ոչ ճիշտ ճանապարհ: Համաձայնության հասնելու համար նա ոչ թե քննարկման դրեց օրինագիծը, այլ սպառնաց պահպանողականներին չաջակցել առաջիկա ընտրություններում:

Թրամփի վերջնագիրը կատաղեցրեց բոլորին: Նույն օրը պահպանողական կազմակերպությունների ղեկավարությունը, որին աջակցում են Կոխ եղբայրները, հայտարարեց, որ կսատարի յուրաքանչյուր այն հանրապետականին, որը պատրաստ կլինի դեմ քվեարկել ՌայանԹրամփ նախագծին:

Պահվածքը, որը բնորոշ է Թրամփ-բիզնեսմենին, սխալ է Թրամփ-քաղաքագետ համար: Եթե Թրամփը կարող էր իր գործերում վերջնագրերով խոսել բիզնեսմենների հետ, ապա նույն տոնը անցանկալի է քաղաքականության մեջ: Ահա և Թրամփի առաջին սխալը:

Հանրապետականները ստիպված էին հետ կանչել օրենքի նախագիծը՝ հասկանալով, որ այն ի սկզբանե դատապարտված է ձախողման:

Մեկը՝ երեք փակուղուց

Ինչո՞ւ է այս ձախողումն այսքան ցավալի Թրամփի համար: Նախագահության 2 ամսում նրա վարկանիշն ընկել էր 40 %-ով: Թրամփը չէր կարողացել կյանքի կոչել մուսուլմանական երկրներին վերաբերող իր ծրագրած արգելքները: Չէր կարողացել լռեցնել շտաբի ու ռուսների կապի մասին սկանդալը:  Ու հիմա, երբ Թրամփին թվում էր, թե շատ հեշտությամբ հաջողության  կհասնի Obamacare-ի դեմ, կրում է խայտառակ պարտություն:

«I alone can fix this country» ասող Թրամփը, ով իրեն համարում էր բանակցություններ վարելու վարպետ, չկարողացավ  պայմանավորվել իր կուսակցության անդամների հետ, անգամ մի քանիսի հետ էլ հասցրեց փչացնել հարաբերությունները:  Նա պարզապես տապալեց Obamacare-ի դեմ ծրագված քվեարկությունը, որը նախատեսված էր անել Օբամայի օրենքի ստորագրման 7-ամյակի օրը: Նա հիասթափեցրեց իր կուսակից ընկերներին, որոնք երկար էին սպասել Բարաք Օբամային «ոչնչացնելու» համար: Արդյունքում՝ հանրապետականներն ու Թրամփն ապտակ ստացան դեմոկրատներից:

Ինչպես հիմա իրականացնել հետագա նախաձեռնությունները. հարկային բարեփոխումը, որին այդքան սպասում է ամերիկյան բիզնես-ոլոտը, Մեքսիկայի սահմանի հայտնի պատի կառուցումը, որի համար անհրաժեշտ է գումար հայթհայթել, գումարած նաև ռազմական ծախսերի ավելացումը:

Այս երեք նախագծերը կարող է անցկացնել միայն ուժեղ նախագահը, որն ունի ժողովրդի հստակ աջակցությունը: Իսկ ո՞ւր են Թրամփի աջակիցները:

Առաջին երկու ամսվա ընթացքում Սպիտակ տան վարչակազմին չի հաջողվել որևէ ուղղությամբ գրանցել առաջընթաց։ Թրամփի առջև դռները, կարծես թե, հերթով փակվում են: Եվ եթե Թրամփը չկարողանա մի բան հորինել այս քաղաքական փակուղուց դուրս գալու համար, ապա  նրա նախագահության շրջանը ընտրողների հիշողության մեջ կարող է մնալ վառ, բայց իմաստազուկ: Ճիշտ այնպես, ինչպես դատարկ տակառի հանած ձայնը:

Աղբյուրը

Գրել կարծիք