Տեղի ունեցավ «Առնո Բաբաջանյան. Խորհրդային շրջանի հայկական ռիթմը» գրքի հեռուստաշնորհանդեսը (տեսանյութ)

«Առնո Բաբաջանյան. Խորհրդային շրջանի հայկական ռիթմը» գրքի նախաբանը գրել է ԳԱԱ Արվեստի ինստիտուտի տնօրեն, արվեստագիտության դոկտոր, պրոֆեսոր Աննա Ասատրյանը։ Նա կարծում է, որ գիտական ուսումնասիրության գլխավոր առավելությունն այն է, որ լույս է տեսել անգլերենով, ու աշխարհին ներկայացնում է հայ երաժշտական արվեստն ու երաժշտությունը. 

«Շատ կարևոր է, որ առաջին անգամ անգլերենով ներկայացվում է հանճարեղ կոմպոզիտորի ստեղծագործական ուղին։ Գրքի հեղինակը՝ Նունե Մելիքյանը, հայ դասական ու ժամանակակից երաժշտության հանրահռչակման հարցում մեծ դեր ունի։ Մեր արվեստի միջազգայնացումը շատ կարևոր է, գիտական, երաժշտական հասարակությունը պետք է ճանաչի հայ երաժիշտներին»։

Աննա Ասատրյանն ասում է, որ բաբաջանյական ստեղծագործության լայն տարածումը շատ կարևոր է, քանի ու կոմպոզիտորը մեր երաժշտության ականավոր ներկայացուցիչներից է, բացառիկ ստեղծագործող, որի երաժշտության մեջ էստրադան ու դասականը զուգորդվել են. 

«Բաբաջանյանն այն բացառիկ կոմպոզիտորներից է, որի յուրաքանչյուր ստեղծագործություն շեդեվր է։ Նա երկար չի ստեղծագործել, քանի որ բավականին երիտասարդ է մահացել, բայց բոլոր ստեղծագործությունները ստացել են ԽՍՀՄ բարձրագույն մրցանակներ։ Նրա ամենահայտնի էստրադային երգերից մեկը «Երևանի սիրուն աղջիկ» երգն է։ Բայց Բաբաջանյանը մեծ երաժիշտ էր նաև դասական երաժշտության ասպարեզում»։

Նունե Մելիքյանն Առնո Բաբաջանյան ֆոնդի Հյուսիսային Ամերիկայի մասնաճյուղերից մեկի ղեկավարն է, հետազոտել է նրա արխիվը, գրքում ներկայացրել բացառիկ ու դեռ երբեք չհրապարակված լուսանկարներ, նամակներ, փաստեր։ Մելիքյանը պատմել է, թե ինչու է ընտրել հենց Բաբաջանյանի ստեղծագործական ուղին բացահայտելու գործը.  

«Շատ եմ սիրում Բաբաջանյանի երաժշտությունը։ Առաջին կատարումը, որ լսել եմ քրոջս կատարմամբ էր։ Նա դաշնամուրի վրա կատարում էր «Վաղարշապատի պարը», այդ օրվանից դա իմ ամենասիրելի ստեղծագործություններից է։ Որոշեցի գրել իմ դոկտորականը Բաբաջանյանի մասին։ Անգլերեն որևէ նման աշխատություն չկար։ 

Բաբաջանյանը մեծ կոմպոզիտոր է, լավագույն երաժիշտներից է։ Դրա համար էլ որոշեցի, որ գիրքը պետք է լինի հատկապես օտար ընթերցողների ու մասնագետների համար։ Գրքի շապիկին կտեսնեք բացառիկ լուսանկարներ, որտեղ Բաբաջանյանը Շոստակովիչի, Սարոյանի հետ է։ Այդ լուսանկարների մեծ մասն ինձ տվել է Արա Բաբաջանյանը՝ Առնո Բաբաջանյանի որդին»։

Նունե Մելիքյանը գրքում հետաքրքիր դրվագներ է ներկայացրել ոչ միայն կոմպոզիտորի մասնագիտական, երաժշտական, այլ նաև անձնական կյանքից։ Փաստերի մի մասը գիտական շրջանակներում հրապարակվում են առաջին անգամ։

Կարդացեք նաև

• Newmag-ը հրատարակել է Խորհրդային միության ամենաազդեցիկ կոմպոզիտորի մասին առաջին անգլալեզու գիտական ուսումնասիրությունը (թրեյլեր)