Newmag-ը ներկայացնում է համաշխարհային բեսթսելլեր. Լի Ստրոբելի «Քրիստոսի իսկության վարույթը» գիրքը (թրեյլեր)

Լի Ստրոբելը Chicago Tribune-ի քրեական բաժնի նախկին խմբագիր է, հետաքննող լրագրող։ Փորձառու լրագրողը հետաքննել է պատմության մեջ ամենամեծ առեղծվածը՝ կա՞ հավաստի ապացույց, որ Հիսուս Նազովրեցին իսկապես Աստծո որդին է: Գրքում կհանդիպեք Քեմբրիջի, Փրինսթոնի համալսարաններում և այլ բարձրագույն կրթական հաստատությունների գիտնականների գնահատականների։ 

Ստրոբելը իր հետաքննության էությունը բացատրում է շատ պարզ: Գրքի հիմքում չորս փաստեր են, որոնք անվիճելի ու անհերքելի են. «Առաջինը՝ մահապատիժը փաստ է: Քրիստոսը չէր կարող ողջ մնալ խաչի վրա: Սա ապացուցված է: Երկրորդը՝ վաղ վկայություններ: Ինչո՞ւ է սա կարևոր: Հարությունը կասկածի տակ դնողները պնդում են, թե Քրիստոսից 100-150 տարի հետո լեգենդներ են հյուսվել նրա Հարություն առնելու մասին: Բայց Հարությունը որպես լեգենդ չի դիմանում քննադատությանը, որովհետև լեգենդի համար ժամանակ էր պետք: Ըստ պատմաբանների դրա համար անհրաժեշտ էր առնվազն երկու սերունդ, մինչդեռ այս դեպքում խոսքը ամիսների մասին է»: 

«Ոսկե մեդալի» արժանացած այս գիրքն ընթերցվում է գրավիչ վեպի պես, բայց այն գեղարվեստական չէ: Ըստ հեղինակի, բազմաթիվ մարդիկ կարդացել ու դարձի են եկել, մոտեցել են եկեղեցուն, ինչպես և նա։ Այս հետաքննության պատճառը եղել է կինը, որը խորապես տարվել էր քրիստոնեությամբ, իսկ ինքը՝ աթեիստ էր: Ընտանեկան հարաբերությունները փրկելու համար լրագրողն անցնում է գործի՝ կնոջը ապացուցելու համար, թե փաստերը հօդս են ցնդեցնում այն ամենը, ինչին հավատում է նա ու ևս երկու միլիարդ մարդ: 

Լրագրողական հետաքննությունը Լի Ստրոբելին տանում է անկանխատեսելի ճանապարհներով, ծանոթացնում բացառիկ վկայությունների հետ: Աշխարհի լավագույն պատմաբանները, աստվածաբաններն ու մարդաբանները, նույնիսկ բժշկագիտության ոլորտի մասնագետները ներկայացնում են փաստեր, որոնց հիման վրա հետաքննելով Քրիստոսի գործը՝ Լի Ստրոբելը մոտենում է իր համար մեծագույն առեղծվածի բացահայտմանը:

«Քրիստոսի իսկության վարույթը»  գրքի շնորհանդեսն ապրիլի 25-ին, 19:00, «Զանգակ» գրատանը։ Բացառիկ հրատարակությունը կներկայացնեն Մայր աթոռ Սուրբ Էջմիածնի հրատարակչական բաժնի տնօրեն Տեր Արարատ Պողոսյանը, գրքի թարգմանիչ Աստղիկ Սարգսյանը, խմբագիր Տաթև Նալբանդյանը։ Մուտքն ազատ է։