Տեղի ունեցավ «Խառնակչի նամակներ» գրքի հեռուստաշնորհանդեսը (տեսանյութ)

Քլայվ Սթեյփլս Լուիսը 20-րդ դարի ամենաազդեցիկ մտածողներից ու գրողներից մեկն է: Նա եղել է Օքսֆորդի համալսարանի անգլիական գրականության գիտաշխատող և դասախոս, Քեմբրիջի համալսարանի միջնադարյան և վերածննդի անգլերենի ամբիոնի ղեկավար։ Գրել է ավելի քան 30 գիրք։

«Խառնակչի նամակներ» գիրքը գրված է նամակների տեսքով, որոնց միջոցով Ավագ դևն իր զարմիկին՝ Գարշուկին սովորեցնում է, թե ինչպես պետք է երկրի վրա ապրող մարդուն գայթակղի, շեղի ճիշտ ճանապարհից։ 

Գիրքն ընթերցողներին ներկայացրեց Գիտական հետազոտությունների զարգացման կենտրոն կրթամշակութային հիմնադրամի տնօրեն, այս գրքի ընթերցող Վահագն Պողոսյանը։ Նա  կարծում է, որ հեղինակի գրքերն արդիական են, պարզ ու հասականալի բացատրում են քրիստոնեության հիմունքները, գաղափարները. 

«Սա լավ գիրք է հատկապես երիտասարդների ու պատանիների համար։ Լուիսը մի լավ խոսք ունի, ասում է՝ ջրով բացած քրիստոնեություն։ Հեղինակը հայրաբանական ձևով, առանց աստվածաբանական տերմինների պատմում է Աստծո, քրիստոնեության մասին։ Լուիսը լավագույնն է այս կարգի գրականության մեջ»։

Վահագն Պողոսյանն ասում է, որ մեր հասարակությունը հետխորհրդային, քրիստոնեությամբ չդաստիարակված սերնդի ներկայացուցիչ է։ Հեղինակը ցույց է տալիս, թե ինչ կաևոր են քրիստոնեական ավանդույթները, ինչու է պետք գնալ եկեղեցի, ինչպես է պետք աղոթել. 

«Հիմա, ավելի քան երբևէ արդիական է կարդալ քրիստոնեական գրականություն։ Մենք պետք է վերանայենք մեզ, մեր նյութապաշտությունը։ Ընդհանրապես, քաղաքակիրթ աշխարհում կրթված մարդիկ կրթության խորհրդանիշներից մեկը համարում են անհավատությունը, որն անձնական դժբախտության, պետության ու քաղաքակրթության կործանման տանող ճանապարհներից է»։

Վահագն Պողոսյանը գիրքը խորհուրդ տվեց կարդալ բոլոր մտածող մարդկանց, նրանց, ովքեր բողոքական քարոզչության ու հակաավանդական դարաշրջանում կարիք ունեն ավանդույթների, իրական, խորը մշակույթի ու գրականության։

Կարդացեք նաև

• Լույս է տեսել 20-րդ դարի մտավոր հսկաներից մեկի՝ Քլայվ Սթեյփլս Լուիսի «Խառնակչի նամակներ» գիրքը (թրեյլեր)