Newmag-ը ներկայացնում է Յուվալ Նոյ Հարարիի «XXI դարի 21 դասերը» բեսթսելլերը (տեսանյութ)

2020 թվականին Newmag հրատարակչությունը լույս ընծայեց վերջին տարիներին համաշխարհային բեսթսելլեր համարվող Յուվալ Նոյ Հարարիի «Sapiens. Մարդկության համառոտ պատմություն » գիրքը: Այս աշխատությունը մեծ արձագանք ստացավ հայ ընթերցողների շրջանում՝ գրախանութներում կարճ ժամանակ անց  առաջին տպաքանակը սպառվեց: Այսօր արդեն ներկայացնում ենք Հարարիի 2-րդ գիրքը, որը նաև կարելի է համարել Սապիենսի  շարունակություն: «XXI դարի 21 դասերը» գրքով Հարարին առաջ է քաշում բազմաթիվ կարևոր հարցեր, որոնց պատասխանները պետք են մեր գոյատևմանը, մեր անցյալն ու ներկան հասկանալու ճանապարհին:

Գիրքը սկսվում է քաղաքական ու տեխնոլոգիական ժամանակակից խնդիրների ուսումնասիրությամբ։ 20-րդ դարի վերջում թվում էր, թե ֆաշիզմի, կոմունիզմի ու լիբերալիզմի միջև գաղափարական հզոր պայքարն ավարտվել է լիբերալիզմի անվերապահ հաղթանակով։ Սակայն, ինչպես սովորաբար պատահում է, պատմությունն անսպասելիորեն փոխեց ընթացքը և ֆաշիզմի ու կոմունիզմի վախճանից հետո լիբերալիզմը հայտնվեց փակուղում։ Ուրեմն դեպի ո՞ւր ենք շարժվում, ի՞նչ է իրականում կատարվում այս պահին, որո՞նք են այսօրվա մարտահրավերներն ու այլընտրանքները,  ինչպե՞ս են համակարգիչները և ռոբոտները փոխում մարդ լինելու իմաստը՝ հարցեր, որոնք Յուվալ Նոյ Հարարին առաջ է քաշում իր նոր գրքում:

«XXI դարի 21 դասերը» աշխատության միջոցով պատմաբանը ստիպում է մտածել արժեքների և իմաստի մասին, հասկանալ, թե ինֆոաղմուկով և անորոշությամբ լի այս աշխարհում  ո՛րն է մեր առաքելությունը:

Գրքի խմբագիր Տաթևիկ Նալբանդյանը նկատում է. ««XXI դարի 21 դասերը» աշխատության միջոցով պատմաբանը ստիպում է մտածել արժեքների և իմաստի մասին, հասկանալ, թե ինֆոաղմուկով և անորոշությամբ լի այս աշխարհում  ո՛րն է մեր առաքելությունը»:

21 գլուխներում, որոնք և՛ դրդում են ընդվզել, և՛ մտածելու տեղիք են տալիս, գիտնականը շոշափում է բազմաթիվ խնդիրներ։ Այս գրքում Հարարին կենտրոնացել է  ներկայի վրա՝ փորձելով հասկանալ, թե ինչ է կատարվում այստեղ և հիմա, սակայն առանց ապագան աչքաթող անելու։ Ի՞նչ է տեղի ունենում հիմա։ Որո՞նք են այսօրվա մեծագույն մարտահրավերներն ու հնարավորությունները։ Ինչի՞ն ուշադրություն դարձնենք։ Ի՞նչ սովորեցնենք մեր երեխաներին։

Հարարիի «Sapiens. Մարդկության համառոտ պատմությունը» գրքի վերաբերյալ կարդացեք

• Յուվալ Նոյ Հարարիի «Sapiens. մարդկության համառոտ պատմություն» գիրքը թարգմանվել է հայերեն
• newmag-ը ներկայացրեց «Sapiens. Մարդկության համառոտ պատմություն» գիրքը (տեսանյութ)
• Ինչո՞վ է յուրահատուկ «Sapiens. Մարդկության համառոտ պատմություն» գիրքը (տեսանյութ)
• http://Ինչո՞ւ են համաշխարհային առաջնորդները մարդկության ապագան քննարկում Յուվալ Նոյ Հարարիի հետ

Գրքի թարգմանիչ Լիանա Զաքարյանը նկատում է՝ գերակա հարցերը մնում են նույնը. ի՞նչ է այսօր կատարվում աշխարհում և ո՞րն է այս իրադարձությունների խորքային իմաստը. «Գիրքը փորձում է համաշխարհային կարևորության խնդիրները, որոնք  ազդեցություն են ունենալու մեր մոլորակի ապագայի վրա, լուսաբանել տարբեր կողմերից՝ սակայն առանց իրականության սպառիչ պատկեր ներկայացնելու հավակնության։  Ինչու՞ է լիբերալ ժողովրդավարությունը ճգնաժամ ապրում։ Վերադառնու՞մ է արդյոք կրոնական գիտակցությանը։ Նոր համաշխարհային պատերա՞զմ է սպասվում։  Ո՞ր քաղաքակրթությունն է իշխում աշխարհը՝ արևմտյա՞ն, չինակա՞ն, թե՞ իսլամական։ Սրանք մի քանիսն են այն 21 կարևոր հարցերից, որոնց շուրջ խորհում է հեղինակը՝  կոչ անելով ընթերցողին անտարբեր չմնալ մարդկության ապագայի մասին բանավեճի հանդեպ»:

Կարծիքներ Հարարիի «Sapiens. Մարդկության համառոտ պատմությունը» գրքի մասին

• Առավոտ» օրաթերթի հատուկ անդրադարձը «Սափիենս» գրքին
• Գիրք, որ ստիպում է մտածել․ համաշխարհային մամուլը՝ Sapiens բեսթսելլերի մասին
• Հայ գիտնականների կարծիքը Sapiens գրքի մասին

Գիրքը երկխոսություն է հանրության հետ, և շատ գլուխներ գրվել են ի պատասխան ընթերցողների, լրագրողների ու գործընկերների: Newmag-ը հայերեն թարգմանությունն իրականացրել է «Գալաքսի» ընկերությունների խմբի հետ գործընկերությամբ: Հայերեն հրատարակության համար հատուկ նախաբան է գրել «Գալաքսի» ընկերությունների խմբի համահիմնադիր, «Յուքոմ» ընկերության տնօրենների խորհրդի նախագահ Գուրգեն Խաչատրյանը:  Ըստ նրա, այս գիրքն անդրադառնում է մարդկության ձեռքբերումներին ու ձախողումներին՝ ընդունված ճշմարտություններին մոտենալով հակառակ, հաճախ անսպասելի և սթափեցնող տեսանկյունից. «Newmag-ի հետ գործընկերությամբ ներկայացնում ենք Յուվալ Նոյ Հարարիի եռագրության հաջորդ հատորը։ 21 խորաթափանց էսսեների միջոցով Հարարին ներկայացնում է «հետճշմարտության» աշխարհը, և մեր թիմի համար մեծապես կարևոր է, որ հայ ընթերցողը մասնակիցը լինի ապագայի քննարկումների գլոբալ դիսկուրսին։ Արդյոք մենք յուրացրե՞լ ենք 21-րդ դարի դասերը կամ առհասարակ քաջություն ունեցե՞լ ենք առերեսվելու դրանց հետ»։

Յուվալ Նոյ Հարարիի հոդվածները

• Կորոնավիրուսը հենց այն պահն էր, երբ հաստատվեց վերահսկողական նոր ռեժիմ
• Կորոնավիրուսը կարող է հանգեցնել քաղաքական, տնտեսական և նույնիսկ հոգեբանական ճգնաժամի
• Ինչո՞ւ են մարդիկ կառավարում աշխարհը
• Ֆեյք Նյուզի Ֆենոմենը. այն միշտ է եղել

Հարարին, որը 21-րդ դարի ամենաազդեցիկ գիտնականներից է, համոզված է՝ գլոբալացումն աներևակայելի ճնշում է գործադրում մեր անձնական վարքի ու բարոյական սկզբունքների վրա։ Մենք բոլորս խճճվել ենք ամենահաս սարդոստայնի մեջ, որը մի կողմից սահմանափակում է մեր շարժումները, իսկ մյուս կողմից մեր նույնիսկ ամենաչնչին տատանումներն է փոխանցում հեռու-հեռուներ։ Մեր ներկայի կարևորագույն 21 հարցերն ու դրանց վերաբերյալ ծանրակշիռ պատասխաններն ընթերցեք «XXI դարի 21 դասերը» գրքում: