Տեղի ունեցավ Սաթի Սպիվակովայի «Իրական դասական» գրքի հեռուստաշնորհանդեսը (տեսանյութ, լուսանկարներ)

Ինչպես գրքի թարգմանիչ Անուշ Մարտիրոսյանն է ասում, այս  ժողովածուից բոլորը սովորելու բան ունեն. «Մեծ հաճույք եմ ստացել այս գործը անելուց, նյութը շատ հետաքրքիր է եւ ճանաչողական առումով, եվ մարդկային առումով»:

Գրքի խմբագիր Արմեն Ամիրխանյանն էլ շեշտում է, որ հայ հանրությանը օգտակար ու հետաքրքիր գիրք է ստացվել. «Առաջին տողերից այն տպավորությունն էր, թե ինչպիսի հոտառությամբ է Newmag-ը հաջողացնում գտնել, թե ինչպես է գտնում այն  թիրախները, որ պետք է հայ ընթերցողին»:

Գրքի թարգմանությունը, խմբագրումն ու հրատարակումը տևել են մոտ երկու տարի: «Իրական դասականը» բացահայտում է մեր կողքին ապրող լեգենդներին: Նրանց հոգեկերտվածքը, ապրումներն ու երաժշտական ճաշակը: Հայ-ռուսական «Օրակուլ» մատենաշարի ղեկավար Ռուբեն Իշխանյանի կարծիքով, գիրքը հիանալի նվեր է բոլոր առիթների համար, հատկապես, եթե նվիրում եք արվեստ սիրող մեկին. «Հայ ընթերցողին կհետաքրքրի Ազնավուրի հարցազրույցը, բոլոր հարցազրույցները հետաքրքիր են ու բազմաշերտ, բոլոր առիթներով կարելի է նվիրել այս գիրք մարդկանց, որոնք սիրում են արվեստը»:

Սաթի Սպիվակովայի գրքում տպավորիչ հարցազրույցներն ու մտքերն ընթերցողին մտածելու թեմաներ են տալիս: Հարյուրավոր հարցազրույցներից հեղինակը գրքի համար ընտրել է մի քանի տասնյակը: Արվեստի մասին պատմում են՝ այդ  արվեստը ստեղծողները. «Գրքի գաղափարը վաղուց ունեի, 13 տարի հաղորդումս եթերում էր... նյութն առատ էր: Առանձնացրեցի այն հարցազրույցները, որոնց հերոսներն իրենց ժամանակի դասականներն են: Մարդիկ, որոնց խոսքը կարելի է կարդալ այսօր էլ, վաղն էլ: Դրանք երբեք չեն հնանա»:

Սաթի Սպիվակովան վստահ է՝ գիրքը կհետաքրքրի նաեւ «Իրական դասականը» հաղորդման հեռուստադիտողին, քանի որ հաղորդումը դիտելիս մարդիկ հաճախ կենտրոնանում են արտաքինի ու ժեստերի վրա՝ բաց թողնելով խոսքը: Գրքում կարևորը միտքն է, այն ավելի ազդեցիկ է ու մնայուն: