Ի՞նչ կապ ունի Թոմ Հարդիի  «Եկամուտը» Սերգեյ Բեզռուկովի «Բրիգադայի» հետ

Ի՞նչ կապ ունի Թոմ Հարդիի «Եկամուտը» Սերգեյ Բեզռուկովի «Բրիգադայի» հետ

Բրիտանական կինոյի խուլիգանի այս մինի-սերիալը դուրս է մնացել կինոմանների ուշադրությունից: Բայց չէ որ քրեական դրաման կարծես Հարդիի կենսագրությունից լինի: newmag-ն առաջարկում է ծանոթանալ բրիտանացի ժամանակակից ամենահայտնի դերասանի անհայտ ֆիլմին:

The_Take_MiniseriesՆախապատմություն

Թոմ Հարդին` վերջին շրջանում խիստ պահանջված ու գնահատված բրիտանացին, մինչև հոլիվուդյան կինոկարիերան սոլիդ ֆիլմացանկ ուներ հայրենիքում: Դերասանին նկատեցին 2000-ականների վերջին, Գայ Րիչիի «Ռոքնրոլայից» հետո, իսկ մինչև Քրիսթոֆեր Նոլանի «Սկիզբը» Հարդին հայտնվեց մինի-սերիալում, որը, ցավոք, մնաց աննկատ:

Բեսթսելերի էկրանավորումը ռուսական հեռուստատեսությամբ եթեր չգնաց, նաև չունեցավ մասնագիտական թարգմանություն ու մինչև օրս համացանցում շրջում է ականջ կտրող, միապաղաղ կրկնօրինակմամբ:

Պատմության հիմքում ընկած է սցենարիստ և պրոդյուսեր Մարթինա Քուոլի համանուն վեպը, որը լույս տեսավ սերիալի ստեղծումից մի քանի տարի առաջ: Հետաքրքիր է, որ գլխավոր դերակատարներից մեկը Հարդիի իրական կինն է՝ Շարլոթ Րայլին:

s21df137ac2d6227cb4d9997ac1724d9dd4271b69dԻնչի՞ մասին է սերիալը

«Եկամուտը» չորս էպիզոդից բաղկացած ընտանեկան դրամա է` քրեական պատմությանը և թրիլերին բնորոշ անկեղծությամբ ու բռնություններով միքսված: Լոնդոնյան սլենգը, հայհոյանքները և արյունոտ ծեծկռտուքները երկու զարմիկների անօրինական գործողությունների և ընտանեկան խնդիրների համար լավ ֆոն են: Ֆրեդին (Հարդի) և Ջիմին (Շոն Էվանս) իրենց կյանքը կապել են երկու քույրերի հետ, սակայն չունեն եկամտի աղբյուր, որով կարող են արժանավայել պահել իրենց ընտանիքները: Ֆրեդին նոր է դուրս եկել բանտից, որտեղ «ճիշտ» կապեր է հաստատել տեղացի ամենավտանգավոր քրեական գործչի հետ:


Դիանա Մարտիրոսյանի սյունակում կարդացեք նաև`

the-take


Եվ եղբայրները սկսում են իրենց գանգստերական արշավը: Սակայն շատ շուտ պարզ է դառնում, որ Ֆրեդին քրեաբիզնեսային խոսակցությունների համար չափից դուրս էմոցիոնալ է, անկառավարելի և տաքարյուն, որի հետևանքով բազում խնդիրներ են ծագում «գործընկերների» հետ: Ջիմին «մաքրում է» եղբոր հետևից, հանգստացնում և նախատում է նրան` յուրաքանչյուր չմտածված արարքից հետո, փորձում է շտկել սխալները, մինչդեռ անկուշտ զարմիկը վազում է հերթական շրջազգեստի հետևից, առաջին իսկ հարմար առիթի դեպքում դավաճանում կնոջը և օրերով անտեսում սեփական երեխաներին: Եղբայրների կանայք փորձում են համակերպվել. մեկը մխիթարանք է գտնում ալկոհոլի մեջ, մյուսը սկսում է սեփական գործը:

Ի՞նչ ենք ստանում

Սերիալը հանդիսատեսին տեղափոխում է անգլիական փողոցային կոլորիտին համապատասխանող 80-ականներ և 90-ականներ՝ լի սև, կաշվե բաճկոններով, բազմաթիվ ոսկե զարդերով և ծխած փաբերով քաղաք: Հադրին ներկայացնում է միջին դասակարգից գուցե մեկ աստիճան ցածր անգլիացու, որը գռեհիկ է, անդաստիարակ, հանդուգն և եսակենտրոն: Բրիտանական ջենտլմենության հետ որևէ կապ չունեցող այս կերպարը շատ հեշտ կարող է ազդել հանդիսատեսի նյարդերի վրա՝ հակակրանք առաջացնելով իր հանդեպ:

Նրա կողքին ակնհայտորեն կոնտրաստային է սառը և զուսպ Ջիմին, որի ընտանիքը եղբոր անտիպոդն է՝ թե´ վիզուալ, և թե´ պահվածքի տեսանկյունից: Ֆրեդին` կնոջն ու երեխաներին զրկելով պատշաճ խնամքից, սիրուց և հարգանքից, նրանց դարձնում է դժբախտ և անտեսված: Հոր սիրո կարիքն ունեցող որդին ատելությամբ է լցվում զարմիկի հանդեպ, որի նկատմամբ Ֆրեդիի ջերմ վերաբերմունքն ակնհայտ է: Կինը (Քիրսթոն Վերեյնգ) կուլ է տալիս հաբերի հերթական չափաբաժինը` ստամոքս ուղարկելով ալկոհոլի հետ: Վերեյնգը, մյուս բոլոր դերասանների պես, հրաշալի է ցուցադրում իր կերպարի հուսահատությունը. նրա լղոզված շպարն ու արցունքները, հսկայական ոսկե շղթան` մարզաշապիկի վրա, ու արհեստական շրթունքները լիարժեք են դարձնում էմոցիոնալ և լքված կնոջ կերպարը: Ի տարբերություն մեծ քրոջ, մենք տեսնում ենք խոհեմ և հանգիստ Մեգգիին (Շարլոթ Ռայլի), որը պատկերված է լեդիի կարգավիճակում:

Հետաքրքիր է, որ չնայած խիստ տեղական մթնոլորտին, պատմությունը հիշեցնում է և´ իտալո-ամերիկյան «Սոպրանոների կլանը», և´ ռուսական «Բրիգադան»:

Երեքժամանոց ընտանեկան դրաման լի է լարված իրավիճակներով, որոնք հիմնականում գլխավոր հերոսի անկառավարելի խենթության արդյունքն են: Հարդիի հերոսը չի զղջում իր դաժանությունների համար, կարող է վախեցնող ծիծաղով և աննորմալի հավաստի դիմախաղով վրեժ լուծել սեփական հորից: Որոշ քրեական հնարքներ չեն զարմացնի այս ժանրը ուսումասիրածներին, սակայն դերասանների համոզիչ խաղը և սյուժետային հարթ ընթացքը չեն ձանձրացնի սերիալասեր հասարակությանը: Հերոսները զարգացում գրեթե չեն ապրում, ավելի շուտ՝ հասունանում են և «պայթում» վերջին էպիզոդում: Չնայած սպասելի է նրանց որդիների ու իրենց միջև ընկած կոնֆլիկտը, այնուամենայնիվ կրտսերների միջև ընկած սյուժետային գիծը որոշակի հմայք է ավելացնում սյուժեին:

Այս պատմության մեջ երկու տղամարդու արանքում ընկած է բիզնեսը, փողը, կինը և երեխան՝ բոլոր հնարավոր կռվախնձորները մեկ վայրում:

Բրիտանացիների այս խավին բնորոշ հայհոյանքներով, կիտչային վիզուալիզացմամբ և կենցաղով մենք տեսնում ենք Թոմ Հարդիի հերոսի ճանապարհը, որի ղեկն ամբողջովին վերջինիս ձեռքերում է: Եթե կա հնարավորություն դիտել ֆիլմը բնօրինակով՝ բաց մի թողեք նմանատիպ հնարավորությունը և ռեալիստիկ անկողնային տեսարաններից, մահամերձ տնքոցներից և լացակումաց հեծկլտոցներից բացի դուք կծանոթանաք բազմաթիվ անգլիական էպիտետների և թևավոր խոսքերի հետ:

Գրել կարծիք