«XXI դարի 21 դասերը» գրքում Հարարին ցույց է տալիս անխուսափելի զարգացումների հետևանքները (տեսանյութ)

«XXI դարի 21 դասերը»  իրականում որևէ խրատ չեն պարունակում: Գիրքը ոչ ապագան է կանխատեսում, ոչ էլ  գուշակություններ անում: Սակայն ցույց է տալիս անխուսափելի զարգացումների հետևանքները: Տեխնոլոգիաների նկատմամբ աշխարհում կա խիստ ընդգծված դրական վերաբերմունք, մինչդեռ ոգևորությունը, ըստ Հարարիի, խիստ միակողմանի է. «Որևէ մեկը չի կարող ասել, թե ինչ տեսք կունենա աշխարհը 2100 թվականին: Իմ խնդիրը ոչ թե գուշակություններով զբաղվելն է, այլ տարբեր հնարավորություններն ու հավանականությունները քարտեզագրելը՝ հույսով, որ կխուսափենք վատագույն սցենարից»:

Ֆեյսբուքի հիմնադրի հետ զրույցում Հարարին բացատրում է. լավ է, որ աշխարհում ավելի շատ մարդիկ են կարողանում արտահայտել իրենց ձայնը, սակայն դա չի կարող լինել միայն ոգևորության պատճառ. «Մարդու մեջ ներքին ձայն կա, որը հուշում է, թե ինչն է ճիշտ, ինչը սխալ: Որքան կարողանում ենք մեր ներքին ձայնը արտահայտել, այնքան մթնոլորտը դառնում է ժողովրդավարական, սակայն միաժամանակ, այդ ձայների բազմազանության մեջ շատ ավելի հեշտ է դառնում մարդկանց ապակողմնորոշելը և դրդելը, որ նրանք հավատան կոնկրետ ձայներին»:

Յութուբյան իր ալիքում Հարարին կարճ տեսանյութերով առանձնացրել է 21 դասերի հիմնական ուղերձները: Գիրքը լի է պոտենցիալ թևավոր խոսքերով: «Անպատեհ տեղեկություններով հեղեղված աշխարհում հստակությունը ուժ է: Այս գիրքը մարդկանց չի տալիս սնունդ կամ հագուստ, բայց առաջարկում է որոշակի հստակություն»: 

Կարդացեք նաև 

• Newmag-ը ներկայացնում է Յուվալ Նոյ Հարարիի «XXI դարի 21 դասերը» բեսթսելլերը (տեսանյութ)
• Տեղի ունեցավ Յուվալ Նոյ Հարարիի «XXI դարի 21 դասերը » գրքի հեռուստաշնորհանդեսը (տեսանյութ)
• Հայկական մամուլի անդրադարձը՝ Հարարիի 2-րդ գրքի հայերեն հրատարակության առիթով

Մարդիկ ապակողմնորոշվել են տեղեկատվական ու տեխնոլոգիական աշխարհում և փրկություն են տեսնում անցյալում: « Քաղաքական գործիչները մեզ ոգևորում են անցյալով, փոխանակ պատրաստեն մեզ մոտ ապագային: Պատճառն այն է, որ մարդկանց մեծամասնությունը կտրուկ փոփոխություն չի սիրում: Նրանք վախենում են անհայտությունից և ցանկանում են ունենալ երաշխավորված ինքնություն, որն իմաստավորում է իրենց կյանքը: Սա է պատճառը, որ տեսնում ենք քաղաքական տեսլականների ալիք, որոնք ավելի շատ ուղղված են դեպի անցյալ, քան ապագա »:

Իմ խորհուրդն է զարգացնել հոգեկան հավասարակշռությունն ու հուզական ինտելեկտը: 

Գիրքը վիճելի պնդումներից զատ բացատրում է, թե ինչ է սպասում մեր երեխաներին ու հատկապես թոռներին: Նրանք ապրելու են բոլորովին այլ, շատ ավելի լարված աշխարհում: Այն, ինչ այսօր սովորեցնում են դպրոցներում, վաղը կարող է ընդհանրապես անիմաստ լինել: « Իմ խորհուրդն է զարգացնել հոգեկան հավասարակշռությունն ու հուզական ինտելեկտը: Կյանքը, ավանդաբար, երկու մասից է բաղկացած, ուսում և աշխատանք: Առաջին մասում դուք ստեղծում եք ձեր կայուն ինքնությունը, ձեռք եք բերում անձնական և մասնագիտական հմտություններ: Կյանքի երկրորդ հատվածում դուք հենվում եք առաջին մասում ձեռքբերվածի վրա, սակայն 2040 թվականին այս բանաձևը ի չիք է դառնալու»:

Հարարին զգուշացնում է՝ պատրաստվեք անընդմեջ սովորելուն: Ապրելու այլ տարբերակ կարող է չլինել: Մարդիկ այլևս չեն կարողանալու գոյատևել ունենալով մեկ մասնագիտություն, մեկ կարիերա, կյանքի մեկ ճանապարհ: 21-րդ դարը լինելու է բազմագիտակների աշխարհ: