Դիկերի հաջողության բանաձևը. ինչպես շվեյցարացի երիտասարդ գրողը գրավեց համաշխարհային գրական աշխարհը (տեսանյութ)

Շվեյցարացի, ռուս-ֆրանսիական արմատներով գրողի «Ճշմարտությունը Հարի Քվեբերտի գործի մասին» դետեկտիվը համաշխարհային բեսթսելլեր է։ Newmag հրատարակչությունը 2023 թվականին այն հայերեն հրատարակեց Ժոել դիկերի այդ վեպը։ Այն միանգամից դարձավ բեսթսելլեր։ Վեպը Հայաստանում վերահրատարակվել է երկու անգամ, վաճառվել է հազար օրինակ։

Գիրք, որն առաջացնում է կախվածություն։ Ընթերցողներն ապշել էին. մոտ 700 էջը հնարավոր է ընթերցել մեկ շնչով։ Սյուժե՝ գլուխկոտրուկ։ Սա գիրք գրքում է, ինչը դարձել է Դիկերի գրական սուպերհնարքը։

Դիկերն իր սիրելի հերոսին՝ Մարկուս Գոլդմանին չթողեց նախորդ վեպում։ «Հարի Քվեբերտի» սիրելի կերպարը գրողի նոր վեպում է՝ «Բալթիմորների գրքում»։ Նախորդ վեպում Գոլդմանը բացահայտում էր իր դասախոսի պատմությունը։ Այս անգամ Գոլդմանը փորփրում է իր ընտանիքի՝ Գոլդմանների պատմությունը, վերապրում երջանիկ, արտասովոր մանկության հուշերն ու բացահայտում երեք հարազատ մարդկանց անհավանական ու ցնցող մահերը

Շրջադարձ՝ շրջադարձի հետևից և կեղծ ավարտներ. Դիքերը գրական հնարքների և մոլորեցման վարպետ է, նրա վեպերը հայտնի են բազմաթիվ սյուժետային ոլորաններով, որոնք ընթերցողներին ստիպում են մինչև վերջին տողն այդպես էլ չկռահել եղելությունը։ Դիկերը նաև ժամանակի ու տարածության իսկական աճպարար է։ Նրա վեպերը երբեք չեն պատմում միայն մեկ ժամանակշրջանի կամ վայրի մասին։ Բալթիմորների գրքում էլ բազմաթիվ ժամանակային ուղևորություններ կան։ Նրա պատմություններն անցնում են անցյալի ու ներկայի միջով՝ բացահայտելով նոր առեղծվածներ և խորացնելով հիմնական ինտրիգը։

Դիկերի պատմությունները պարզապես հետաքրքիր են։ Նրա գրական գլխավոր առանձնահատկությունն արձակի հեշտ ընթերցումն է։ Դիկերը թրիլլերի ու դետեկտիվի վարպետ է, նրա խճճված պատմություններին միահյուսվում է հերոսների անձնական դրաման։ Դիկերը սիրում է գրել մանկության, երիտասարդության ու ընտանեկան հարաբերությունների մասին ու թե ինչպես է անցյալն ազդում ներկայի վրա։ Ժոել Դիկերն ունի գեղարվեստական հզոր տաղանդ, 21-րդ դարի գրական մտածողություն և մարկետինգային հոտառություն։

Կարդացեք նաև

• Francofest2025 /Newmag-ը ներկայացնում է «Ճշմարտությունը Հարի Քվեբերտի գործի մասին» համաշխարհային բեսթսելլերի շարունակությունը (թրեյլեր)
• Newmag-ը Արմենիա Հ/Ը եթերում ներկայացրեց Ժոել Դիկերի «Բալթիմորների գիրքը» և Պասկալ Բրուկների «Իմ փոքրիկ ամուսինը» վեպերը (տեսանյութ)