Ջոնաթան Ֆրանզենն ամերիկացի գրող է, էսսեիստ և քննադատ։ Նրա գրական ոճը բնորոշվում է սուր, սոցիալական դիտարկումներով, ընտանեկան դրամաների և ժամանակակից կյանքի բարոյական խնդիրների խոր վերլուծությամբ։ 

Ջոնաթան Ֆրանզենն արժանացել է բազմաթիվ մրցանակների, նաև Ամերիկյան ակադեմիայի մրցանակին և ԱՄՆ ամենահեղինակավոր գրական մրցանակին՝ National Book Award-ին։ Նրա գրքերը լիակատար բեսթսելլերներ են ամբողջ աշխարհում։

Հիմնադրման առաջին իսկ տարվանից Newmag-ը որոշել է հրատարակել Ֆրանզենի գործերը։ Մեծ վեպերի հրատարակությունը սկսվել է «Խաչմերուկներ» գործից։ Այս գրողի գրքերը թարգմանելը բավական բարդ է, քանի որ նա ունի իր հստակ ոճը, հատուկ ձեռագիրը և դրանք պարտադիր հարկավոր էր փոխանցել նաև հայերեն տարբերակ։ 

Գրքի հրատարակման ընթացքում մեր թիմը կապի մեջ է եղել գրողի գործակալների ու նաև անձամբ Ջոնաթան Ֆրանզենի հետ։ Իր վիդեոուղերձում նա ջերմորեն դիմում է հայ ընթերցողներին ու շնորհակալություն հայտնում հրատարակչությանն իր գիրքը հայերեն թարգմանելու համար. 

«Ողջու՛յն։ Ես Ջոնաթան Ֆրանզենն եմ։ Կալիֆոռնիայից ողջունում եմ հայ ընթերցողներին։ Առիթն այն է, որ իմ գիրքն առաջին անգամ լույս է տեսնում հայերեն։ Խոսքն իմ վերջին վեպի՝ «Խաչմերուկների» մասին է։ Գիրքը պատմում է 70-ականների ամերիկյան մի ընտանիքի մասին, որը բախվում էր նույն դժվարություններին, ինչ այլ ընտանիքներ 70-ականներին։ Դրանք կապված են Վիետնամի պատերազմի, քաղաքացիական իրավունքների և, առհասարակ, երիտասարդների դիմադրության հետ։ 

Շնորհակալություն եմ հայտնում իմ հրատարակիչ Newmag-ին, որ վեպը թարգմանեց հայերեն։ Շատ ուրախ եմ, որ առաջին անգամ իմ գիրքը կկարդան նաև հայերեն։ Գիտեմ նաև, որ Newmag-ը մտադիր է շուտով հայ ընթերցողին ներկայացնել իմ մյուս վեպերը ևս։ Սա հույս է ներշնչում, որ մոտ ապագայում Հայաստան գալու առիթ կունենամ։ Շատ կուզեմ հանդիպել հայ ընթերցողներին։ Ընթերցողներն ինձ համար կարևոր են։ Առհասարակ, գրողների համար ընթերցողները կարևոր են։ Ինձ համար՝ հաստատ։ Այսպիսով, մեծ պատիվ է, որ վերջապես հայերեն եմ հրատարակվում։ Եթե կարդաք գիրքը, հուսով եմ՝ այն ձեզ դուր կգա»։

«Խաչմերուկներ» վեպի շնորհանդեսը սեպտեմբերի 5-ին է՝ Գրքի երևանյան միջազգային փառատոնին։ Միջոցառումը տեղի կունենա ՀՀ Ազգային պատկերասրահի «Որմնանկարների սրահում»։ Մուտքն ազատ է։

Կարդացեք նաև

• Ջոնաթան Ֆրանզեն. «Խաչմերուկներ» / Newmag-ը հայերեն է հրատարակել 21-րդ դարի ամերիկյան վիպասանության գլուխգործոցը (թրեյլեր)
• 7 Փաստ՝ Մեծ ամերիկացի վիպասան, «Խաչմերուկներ» գրքի հեղինակ Ջոնաթան Ֆրանզենի մասին