Ազնավուր, Մանուշյան, Սառ, Նոտոմբ ու Լյուգան. Ֆրանկոֆեստի 5 հեղինակները

Անցած տարի newmag-ը ֆրանկոֆոն բովանդակության առաջին փառատոնին ներկայացրեց ֆրանսիացի հայտնի գրող Ամելի Նոտոմբի «Կապույտ մորուքը» գործը։ Այս Ֆրանկոֆեստին հրատարակչությունը կներկայացնի հեղինակի «Թշնամու հարդարանքը» վեպը, որը հրատարակվել է 2001 թվականին: 

Ամելի Նոտոմբի բոլոր գրքերի շապիկներին հենց նա է։ Նոտոմբը սերում է Բելգիայի Էտեերբեկ քաղաքի ազնվական ընտանիքից: Մանկության տարիներին շատ է ճամփորդել, որովհետև հայրը դիվանագետ էր:

Բրյուսելի համալսարանի ռոմանական լեզուների բաժնում ուսանելուց հետո երազանքներով լի մեկնեց Տոկիո: Սակայն տեղ հասնելով՝ հասկացավ, որ նոր աշխատանքն իր երազածը չէ, և սկսեց գրել: Նոտոմբը 26 տարեկանում հրատարակում է առաջին՝ «Հիգիենան և մարդասպանը» վեպը, որից հետո ամեն տարի լույս է տեսնում նրա մի նոր գիրք: Բելգիայի պետական մրցանակի դափնեկիր է: Բելգիայի թագավոր Ֆիլիպը նրան շնորհել է բարոնուհու տիտղոս: 

Նախորդ Ֆրանկոֆեստին newmag-ը հայերեն էր հրատարակել ֆրանսիական ժամանակակից գրականության ամենահոգեթով գրողի գիրքը։ Հայ ընթերցողը «Երջանիկները ընթերցում են և սրճում» գործով ծանոթացավ Անյես Մարտեն-Լյուգանին։ Վեպը հրատարակվել է դեռ 2013-ին, այն գրողի դեբյուտային գործն էր, որն անսպասելի հաջողություն ունեցավ ֆրանսալեզու գրական աշխարհում։ 

Անյեսն ամեն տարի գրում է նոր բեսթսելլեր: Հոգեբան գրողը հայտնի է իր զգացմունքային վեպերով, որոնքներկայացնում են անձնական աճի, ինքնության և մարդկանց հարաբերությունների թեմաները: Նա եղել է կլինիկականհոգեբան, և մասնագիտական փորձն օգնում և խորություն է հաղորդում նաև նրա գրական ստեղծագործություններին:

Այս անգամ newmag-ը հրատարակել է «Թելից կախված երջանկություն» գործը, որը մերօրյա Մոխրոտի պատմություն է: Ի տարբերություն հեքիաթային Մոխրոտի, Անյեսի հերոսուհին չի սպասում, որ բարի փերին փոխի իր ճակատագիրը: 

Հաջորդ գրողը, որի գիրքը թարգմել ու փառատոնին ներկայացնելու ենք, Սենեգալցի հեղինակ Մոհամեդ Մբուգար Սառն է։ Ծնվել է Դաքարում՝ բժշկի ընտանիքում: Ազգությամբ սերեր է: Ավարտել է Սեն Լուի զինվորականդպրոցը: 2009-ին տեղափոխվել է Ֆրանսիա: Գրականություն և փիլիսոփայություն է սովորել Փարիզի Հասարակական գիտությունների առաջադեմ ուսումնասիրությունների դպրոցում։ 

Սառը Սահարյան Աֆրիկայի առաջին գրողն է, որը 2021-ին ստացել է Ֆրանսիայի ամենահեղինակավոր գրական մրցանակը. նրան «Գոնկուր» է շնորհվել «Հիշողության թաքստոցում» գրքի համար։ Գրքի հայերեն հրատարակության շնորհանդեսը տեղի կունենա հոկտեմբերի 12-ին: Հեղինակի սահուն ձեռագիրն ու սյուժեի աստիճանական բացահայտումները ստիպում են շունչը պահած գործն ընթերցել մինչև վերջ:

Ֆրանկոֆեստին newmag-ը կներկայացնի Ֆրանսահայ գործիչ Մելինե Մանուշյանի գիրքը։ Հեղինակը Դիմադրության շարժման հերոս Միսաք Մանուշյանի կինն էր ու մարտական ընկերը: Ցեղասպանությունից փրկված Մելինեն ու Միսաքը հանդիպեցին Փարիզում և սիրահարվեցին միմյանց:

Անհոգությունը շատ կարճ տևեց. սկսվեց Երկրորդ համաշխարհայինը, և Ֆրանսիան օկուպացվեց։ Մելինեն դարձավ Դիմադրության շարժման մարտիկների անփոխարինելի օգնականը և ընդհատակյա պայքարի լիարժեք մասնակիցը։ Ամուսնու մահից 30 տարի անց Մելինեն հավաքեց իր բոլոր հուշերը, իր ամբողջ տխրությունը և ամենը հանձնեց գրքին։ 

Եվս մի բացառիկ հրատարակություն, որն ընթերցողին newmag-ը կներկայացնի Ֆրանկոֆեստին։ Շառլ Ազնավուրի որդին՝ Նիկոլա Ազնավուրը, խնամքով հավաքել ու կազմել է հոր փիլիսոփայության և մտքերի անթոլոգիան: Գրքում մաեստրոյի հազարավոր հարցազրույցներից, անտիպ ստեղծագործություններից հատվածներ են, որոնք ուղեկցվում են անտիպ ու հազվագյուտ լուսանկարներով:

Հինգ գիրք, որտեղ կհանդիպեք կիրք, բոհեմյան կյանք, ներկա պահ, մեռնող սեր, կարեկցանք ու նուրբ հումոր։ Ֆրանկոֆոն բովանդակությամբ փառատոնին հրատարակչության բոլոր գրքերն ընթերցողները կարող են գնել մինչև 40 % զեղչով։

FRANCFEST 2024 ՊԱՇՏՈՆԱԿԱՆ ԷՋ

Փառատոնի գործընկերներ  

• Հայաստանում Ֆրանսիայի դեսպանատուն, 
  
• Ֆրանսիական ինստիտուտ, 
  
• Հայաստանում ֆրանսիական համալսարան, 
  
• Ազնավուր հիմնադրամ
  

Գլխավոր հովանավոր

• Երևանի կոնյակի գործարան
• Ֆրանկոֆոնիայի համալսարանական գործակալություն, 
• Luxury Voyage

Մեդիա գործընկերներ  

• Courrier d'Erevan, 
  
• Nouvelles d'Arménie

Կարդացեք նաև

• Թարգմանչաց տոնին newmag-ը կանկացնի ֆրանկոֆոն բովանդակությամբ աննախադեպ փառատոն / Francofest-2024
• FrancoFest 2024 / GONCOURT մրցանակը ազգային ժյուրի է ստեղծում Հայաստանում