Տեղի ունեցավ ««Հրազդան» ստադիոն. Խորհրդային մոդեռնիզմի գլուխգործոցը» գրքի հեռուստաշնորհանդեսը (տեսանյութ)

Հրազդան մարզադաշտը կառուցել են ճարտարապետներ Կորյուն Հակոբյանն ու Գուրգեն Մուշեղյանը։ ««Հրազդան» ստադիոն» գիրքը լույս է տեսել Գուրեն Մուշեղյանի ընտանիքի աջակցությամբ։ Ճարտարապետի դուստրը՝ դաշնակահարուհի, կոմպոզիտոր, երաժշտական պրոդյուսեր Արաքսյա Մուշեղյանն ասում է, որ իր հոր համար Հրազդան ստադիոնը շատ կարևոր էր, քանի որ այն եղել է ճարտարապետի դիպլոմային աշխատանքը. 

«Հրազդանը լավագույն մարզադաշտերի ցանկում է միշտ եղել։ Հեղինակավոր ճարտարապետական ամսագրերն անդրադարձել են ստադիոնի բացառիկությանը։ Անփույթ չի կարելի վերաբերվել նման կառույցներին։ Հրազդանը կարող է այսօր էլ ծառայել։ Այս գիրքն օգտակար կլինի հատկապես երիտասարդ մասնագետների համար, նրանք կսովորեն հայտնի ճարտարապետների կատարած աշխատանքի, երազանքի մասին, թե ինչպես են իրականացրել դրանք։ 

Գրքում կա նաև հավելված, որտեղ հավաքել ենք հայրիկիս հոդվածները, հրապարակումները, հարցազրույցները Հրազդան մարզադաշտի մասին։ Նրանք ճարտարապետների մի սերունդ էին, որոնք երբեք դեմ չէին գնում իրենց ճարտարապետական, մասնագիտական սկզբունքներին, չնայած Խորհրդային շրջանում շատ ճնշումներ կային։ Հրազդանի կառուցումը հեշտ չի տրվել, քանի որ նման մասշաբի մարզադաշտի համար Երևանում այդքան մարդ չէր ապրում, բայց երկար բանակցություններից հետո կարողացան ապացուցել, որ այդ մարզադաշտը պետք է մեր երկրին»։

Հեռուստաշնորհանդեսին ներկա գրքի հեղինակ, պրոֆեսոր Կարեն Բալյանը համոզված է, որ Հրազդան ստադիոնը հայտնի կառույց է ամբողջ աշխարհում, քանի որ խոհրդային մոդդեռնիզմի կարևոր շինություններից է. «Մասնագիտական շրջանակներում այն մեծ ճանաչում ու հետաքրքրություն ունի։ Արտակարգ գեղարվեստական, քաղաքաշինական որակներ ունի։ Այդ ահռելի կառույցը Հրազդանի կիճում այնքան համահունչ է տեղադրված և՛ լանդշաֆտին, և՛ բնությանը համապատասխան, որ զարմացնում է շատ ճարտարապետների»։

Ըստ Կարեն Բալյանի, այսօր շատ եվրոպական երկրներում են խաղում Հրազդանի կամ ավելի վաղ շրջանի նմանատիպ մարզադաշտերում։ Դրանք նորոգվում են ու համապատասխանեցվում միջազգային չափանիշներին. «Հրազդան մարզադաշտն օլիմպիական մարզադաշտ է։ Այնտեղ ոչ միայն ֆուտբոլ, այլ նաև մարզական այլ խաղերը կարելի է անցկացնել։ Ինչ վերաբերում է դաշտին, լուսավորությանը, նստատեղերին, հանդերձարաններին, բնականաբար, դրանք պետք է նորոգվեն»։

Հեղինակն ընդգծում է կարևոր ուղերձ՝ այդ գրքի նպատակը նաև մարզադաշտը պահպանելն է։ ««Հրազդան» ստադիոնի» շնորհանդեսին ներկաները գրքերից մեկի վրա մակագրել էին՝ ի պաշտպանություն ու պահպանություն ստադիոնի։

Գրքում բազմաթիվ հուշերի մեջ առանձնանում է Արարատ 73-ի ֆուտբոլիստ Էդուարդ Մարկարովի այն միտքը, որ ինքը խաղացել է շատ ստադիոններում, կան լավ ու վատ ստադիոններ, բայց Հրազդանի նման ստադիոն չկա, քանի որ այնտեղ չհաղթել հնարավոր չէր։ 

Կարդացեք նաև

• Ճարտարապետ Գուրգեն Մուշեղյանի 90-ամյակի առթիվ Newmag-ը հայերեն է հրատարակել Կարեն Բալյանի ««Հրազդան» ստադիոն» գիրքը (թրեյլեր)
• Տեղի ունեցավ Կարեն Բալյանի ««Հրազդան» ստադիոն» գրքի շնորհանդեսը (լուսանկարներ)