Դեմ եմ բոլորին. Սեփակա՞ն, թե պարտադրված որոշում. Ինչո՞ւ է Քսենյա Սոբչակը որոշել նախագահ դառնալ

Դեռևս սեպտեմբերին ռուսական լրատվամիջոցները շրջանառեցին այն լուրը, որ Կրեմլը մտադիր է նախագահական ընտություններում խաղի մեջ ներառել կին-թեկնածուի: Իսկ ո՞վ կարող էր ավելի հարմար լինել այդ դերի համար, եթե ոչ Քսենյան՝ երիտասարդ, ժամանակակից, սուր մտքով ու հետաքրքիր կին: Այլ հարց էր, թե ինչ արձագանք կտար Քսենյան:
Սոբչակի թեկնածությանը վերաբերող հարցն ուղղեցին նաև Պուտինին, իսկ նա ուսերը թոթվեց, թե՝ Աստված սիրեք:
Իր հերթին արձագանքեց նաև Նավալնին՝ կոչ անելով Քսենյային երկար մտածել ու չգայթակղվել քաղաքական դաշտ մտնելու հեռանկարով և հեռու մնալ Կրեմլի կեղտոտ խաղերից: Իսկ Քսենյան բարկացած էր նախ լրագրողների, ապա նաև քաղաքական էլիտայի վրա, որ առանց իր կարծիքը հարցնելու, պատասխանը ստանալու՝ շրջանառել էին լուրը:

---

Կարդացեք նաև․

• Ինչո՞ւ է Եվրոպան այդքան սուր ընդունել Ռուսաստանի դեմ ԱՄՆ նոր պատժամիջոցները


• Սյուրռեալիստիկ Ռուսաստան. հայ լուսանկարչի չափազանց իրական ֆոտոշարքը


• «Չեզոքացում» գործողություն. միջազգային լրագրողական հետաքննություն Մակեեդոնիայի ներքին գործերին Ռուսաստանի միջամտության մասին

---

Ինչևէ, ամեն ինչ հերքող Քսենյա Սոբչակը, օրերս հայտարարեց՝ որոշել է դառնալ երկրի նախագահ: Որոշել է, քանի որ դրա մասին շատ խոսվեց, որոշել է, քանի որ ուզում է իշխանության վրա ազդելու լծակներ ունենալ:
Ի պատասխան Նավալնիին, Քսենյա Սոբչակը հայտարարեց՝ ինքը խամաճիկ չէ և ոչ էլ մարդակեր, այլ դեմ է բոլորին: Եվ հենց այս արտահայտությունն էլ հավանաբար կդառնա նրա նախընտրական արշավի կարգախոսը: Քսենյա Սոբչակ՝ «ՌԴ նախագահի թեկնածու, որ դեմ է բոլորին»:
https://www.youtube.com/watch?v=he68RC4f24k
Պետք է նկատել, որ Պուտինը քաղաքական դաշտ մտավ Քսենյա Սոբչակի հոր աջակցությամբ: Դա գիտեն բոլորը: Ու Քսենյան այնքան էլ օտար մարդ չէ Պուտինի համար: Թերևս սա է, որ բոլորին զգուշավոր կդարձնի ու թույլ չի տա հավատալ երիտասարդ, հմայիչ, խելացի Քսենյայի անկեղծությանը: Հիմա նա իսկապես դե՞մ է բոլորին: