Տեղի ունեցավ «Համապարփակ անվտանգություն. Հայաստանի այլընտրանքը փոփոխվող աշխարհում» գրքի հեռուստաշնորհանդեսը (տեսանյութ)

Հեռուստաշնորհանդեսին ներկա «Համապարփակ անվտանգություն» գրքի համահեղինակ, Ազգային դիմակայունության հայկական ինստիտուտի հիմնադիր, քաղաքագիտության թեկնածու Գևորգ Մելիքյանը պատմեց, որ աշխատությունն ի սկզբանե հետազոտություն էր, բայց որոշվեց, որ այն կդառնա նաև գիրք։

Հեղինակները ներկայացրել են բոլոր այն շերտերը, որոնք անվտանգային բաղադրիչի մաս են, քանի որ ժամանակակից աշխարհում անվտանգության բաղադրիչ են ոչ միայն ֆիզիկական ուժը, սահմաններն ու ռազմական գործողությունները, այլ նաև կրթությունը, բնապահպանությունն ու գրեթե բոլոր ոլորտները. 

«Մենք անդադար տեղեկատվական գրոհների տակ ենք, դրանք բոլոր ոլորտներում։ Գրքում Իսրայելի օրինակն ենք բերում, քանի որ մի քանի ամիս Իսրայելում ուսումնասիրել ենք այդ երկրի անվտանգային ու ռազմավարական մտածողությունները, փորձը։ Ուզում էինք տեսնել, թե թշնամական իրավիճակում փոքր պետությունը, ինչպես է դիմակայում ու դիմադրում մարտահրավերներին»։

Գրքում գլխավոր շեշտը ուժի ներկայությունն է ու ռազմական բաղադրիչը։ Մասնագետները կարծում են, որ ուժը նորից գերակայում է։ Հեղինակները քննարկել են նաև, թե ինչպես պետք է հանրությունը պատրաստ լինի այդ խնդիրներին.

«Պաշարված ամրոցի կոնցեպտն ենք քննարկել, մենք շրջապատված չենք քաղաքակիրթ բարեկամ հարևաններով, չունենք ծով, ունենք էներգետիկ խնդիրներ։ Դա թուլացնում է մեզ։ Պետք է ունենալ ուժեղ, պետական ռազմավարական քաղաքականություն։ Հիմնական շեշտն այն է, որ պետք է ունենանք անվտանգության հանդեպ նոր մոտեցում»։

Գրքի հեղինակ Գևորգ Մելիքյանն ասում է, որ այլ երկրների օրինակները գրքում ներկայացրել են ոչ թե նմանակելու, այլ ոգեշնչվելու համար. «Օրինակ, մենք ռելիեֆային առումով ավելի հարմար իրավիճակում ենք գտնվում, քան Իսրայելը, որն անապատային է։ Շվեյցարիան ունի կենտրոնացված համակարգ, որը կորդինացնում է սպառնալիքները, մարդիկ զենք են պահում տանը։ էստոնիան կիբերանվտանգության առաջատարներից է։ Այն ամենն, ինչը վերլուծել ենք, ինչի մասին խոսել ենք, տվել ենք նաև՝ ի՞նչ անել հարցերի պատասխանները։ 

Գրքի վերջում տասնյոթ հայեցակարգային առաջարկներ ենք անում պետական ու ոչ պետական մարմիններին։ Անդրադառնում ենք Սփյուռքի հետ կարևոր աշխատանքին, ստրատեգիական մտածողության զարգացմանը կրթության ոլորտում։ Մեզ պետք են մտածողներ՝ քննադատական ու ռազմավարական։ Գրքում շեշտը դնում ենք նաև հետախուզության վրա, առանց դրա չկա անվտանգություն»։

Այս գրքով հեղինակներն ուզում են փոխել անվտանգության մասին վերաբերմունքը, քանի որ փոփոխվող աշխարհը երբեք ինքն իրեն անվտանգ չի դառնում։

Կարդացեք նաև

• «Ցեղասպանագիտության շաբաթվա» ընթացքում Newmag-ը կներկայացնի Վահագն Դադրյանի «Հայոց ցեղասպանության պատմությունը» գիրքը (թրեյլեր)
  
• «Ցեղասպանագիտության շաբաթը» բացվեց հատուկ հրատարակության՝ Վահագն Դադրյանի գրքի շնորհանդեսով (լուսանկարներ)