Newmag-ը ներկայացնում է Հերմինե Ավագյանի ու Ուլիս Մանեսի «Նամակներ դրախտից, որտեղ ոչ ոք չկա» հուշագրությունը (թրեյլեր)

Մի օր Արցախում Հերմինե Ավագյանը նամակ է ստանում ֆրանսիացի երիտասարդից՝ Ուլիս Մանեսից, որը հետաքրքրվում է՝ ինչպես են ապրում պատերազմից հետո, ինչ են զգում, ինչպես է ստեղծագործում նա, ով ապրում է այդ իրականության մեջ։ 

Այդ նամակից սկսվում է երկխոսություն, որը շուտով դառնում է ավելին, քան պարզապես հարց ու պատասխան։ Նամակները Հերմինեն գրում է Արցախում, Ուլիսը կարդում՝ Փարիզում։ Մի կողմում անծանոթի հետաքրքրասեր հայացքն է, մյուսում՝ կորստի հետ ապրող մարդու ներաշխարհը։ 

Հերմինե Ավագյանի ու Ուլիս Մանեսի երկխոսությունը ձևավորվում է որպես գրական նամականի՝ «Նամակներ դրախտից, որտեղ ոչ ոք չկա»։ Հերմինե Ավագյանը նամակներում վերակենդանացնում է իր աշխարհը՝ տանելով ընթերցողին Արցախի թաքնված արահետներով։ Նրա պատմություններում մանկության հոտն ու գույները միախառնվում են պատերազմի մշուշին։ Դա ոչ թե միայն հիշողություն է, այլ փորձ՝ պահպանելու մի իրականություն, որն այլևս  գոյություն չունի։ 

ֆրանսիացի երաժիշտ է, լրագրող և փիլիսոփայության դոկտոր Ուլիս Մանեսի համար այդ նամակագրությունը դառնում է ճանապարհ դեպի մի աշխարհ, որի մասին նախկինում միայն լսել էր։ Նրա հարցերը, արձագանքները ձևավորում են երկխոսություն, որտեղ տարբեր մշակույթներ չեն բախվում, այլ լրացնում են իրար։  

Գիրքը նաև վավերագրություն է՝ պատերազմի և կորստի ֆոնին ծնված մտերմության մասին։  Նամակներ, որ գրված են լուսավոր կարոտով։ Զրույցներ, որտեղ բառերը չեն կարող փոխանցել հայրենի տունը լքելու ցավը։ Գիրքը երկլեզու է՝ հայերեն և ֆրանսերեն, և պահպանել է նամակագրության կենդանի շունչը։ Հայերեն թարգմանությունը՝ Լիլիթ Բլեյանի։ 

Շնորհանդեսը տեղի կունենա մարտի 28-ին, 15:00-ին, Pushkin Business Club-ում(Պուշկին 25)։ Միջոցառմանը ներկա կլինեն հեղինակները, նաև ֆրանսիական Le Figaro պարբերականի լրագրող Ադրիեն Բրիանը։ Երեկոն կավարտվի երաժշտական կատարմամբ՝ Ուլիս Մանեսի և Լիլիթ Բլեյանի մասնակցությամբ։ 

 «Նամակներ դրախտից, որտեղ ոչ ոք չկա» հուշագրությունը պատմություն է ոչ միայն պատերազմի, այլև այն մասին, թե ինչ է մնում հետո՝ հիշողություն, կարոտ և խոսելու անհրաժեշտություն։ Նամակներ, որոնք շարունակում են ապրել՝ ժամանակից դուրս ու տարածությունից անդին։

Գիրք, որ ծնվեց պատերազմի ու արցախի կորստի օրերին, երբ ֆրանսիացի երիտասարդն անհանգիստ ու տագնապած սպասում էր իր նամակի պատասխանին։  Նամակներ, որ դարձան կամուրջ․ Արցախից Փարիզ՝ մեկ գրքի պատմություն։