«Յելգավա 94» / Newmag-ը հայերեն է հրատարակել Յանիս Յոնևսի կուլտային վեպը (թրեյլեր)

«Յելգավա 94» վեպ Լատվիայում հրատարակվել է 2013 թվականին։ Գիրքը ստացել է լատվիական գրականության, Եվրոպական Միության գրականության, Լատվիայի ամենամյա գրական մրցանակներ։ Լատվիայում բեսթսելլեր դարձած կուլտային այս գիրքը թարգմանվել է 20 լեզվով:

Յանիս Յոնևսը լատվիացի գրող է, դրամատուրգ, Լատվիայի մշակույթի ակադեմիայի մագիստրոս։ Գրում է գրախոսականներ ու ֆրանսերենից թարգմանություններ է անում.

Ըստ  Յանիս Յոնևսի, գիրքը ռոքի ու ծանր մետալի ֆոնին իրենց ես-ը ձևավորող 90-ականների երիտասարդության մասին է։ Նրանք ըմբոստանում են ու ընդդիմանում կարգուկանոնին, ուզում են տարբերվել ու գտնել իրենց տեղն այս աշխարհում.

«Գիրքս դեռահասների մասին է։ Մեր երկիրն էլ այդ ժամանակ դեռահաս էր։ Դեռահասները ներքաշվում են մետալ երաժշտության ենթամշակույթ։ Նրանք ասես ապսատմբներ լինեն, որ դուրս են եկել ամբողջ աշխարհի դեմ, որոնց ոչ ոք, կարծես, չի հասկանում: Գրքի հրատարակումից հետո պարզվեց, որ Լատվիայում շատերն են ունեցել նույն ապրումները»։

2019-ին նկարահանվեց Յանիսի գրքի համանուն ֆիլմը։ Սցենարի հեղինակը Մատիս Գրիցմանիսն է։ Նա վառ անհատականություն է ու հայտնի դեմք։ Ֆիլմը նկարահանվել է հենց Ելգավայում, որտեղ 90-ականներից հետո շատ բան չի փոխվել։

Հատուկ գրքի հայերեն հրատարակության, շնորհանդեսի համար գրքարշավով Հայաստանում է Յանիս Յոնևսը։ Newmag-ը կազմակերպել է գերհագեցած գրքարշավ։ Երեք օրում Յոնևսը կհյուրընկալվի մոտ մեկ տասնյակ լրատվամիջոցների, կհանդիպի հայ գրողներին՝ մեկ գավաթ գինու շուրջ, տեղի կունենա գրքի շնորհանդեսը, ինչպես նաև մշակութային-ճանաչողական այցեր՝ թանգարաններում, տեսարժան ու պատմական վայրերում։ 

«Ելգավա 94» գիրքը հայերեն է թարգմանել Նաիրա Խաչատրյանը։ շնորհանդեսը տեղի կունենա նոյեմբերի 6֊ին, 19:00, Kond House-ում։ Սպասվում է գրական-մշակութային երեկո, որի ընթացքում, պահպանելով գրքի շունչն ու ժամանակաշրջանը, կհնչեն նաև 90-ականների համաշխարհային հայտնի հիթերը։ Մուտք ազատ է, գիրքը՝ զեղչով։