Տեղի ունեցավ շվեդ ամենահայտնի գրող Ֆրեդրիկ Բաքմանի «Տատիկս բարևում է և ասում՝ կներեք» վեպի շնորհանդեսը (լուսանկարներ)
«Զանգակ» գրատանը Newmag-ի ամսվա շրջանակում հրատարակչությունը ներկայացրեց Ֆրեդրիկ Բաքմանի «Տատիկս բարևում է և ասում՝ կներեք» վեպը։ Գրքի շնորհանդեսին ներկա էին թարգմանիչ Աշխեն Բախչինյանը, խմբագիր Աննա Բախշյանը և գրքի գլխավոր գործընկեր, «Բուկինիստ» ընկերության կոմերցիոն տնօրեն Հեղինե Մեդոյանը։ Ապրիլին Newmag-ը «Զանգակում» կներկայացնի ևս երեք նոր հրատարակություն։
Ֆրեդրիկ Բաքմանը շվեդ ժամանակակից, հայտնի գրող է։ Սովորել է աստվածաբանություն, սակայն ուսումը կիսատ է թողել և սկսել է բեռնատար վարել։ Նրա գրքերը թարգմանվել են մոտ 30 լեզուներով, հրատարակվել ավելի քան 40 երկրներում։ «Ուվե անունով մարդը» Բաքմանի առաջին ու ամենահայտնի վեպն է։ Այն հրատարարկելուց երկու տարի անց Newmag-ը հայ ընթերցողին է ներկայացնում ևս մեկ գործ՝ «Տատիկս բարևում է և ասում՝ կներեք» վեպը։
Գիրքը շվեդերենից հայերեն է թարգմանել Աշխեն Բախչինյանը։ Նա համարում է, որ Բաքմանն առհասարակ կոտրում է կարծրատիպեր հասարակության մեջ ու հատկապես հարաբերություններում. «Եթե մենք սովոր ենք որոշակի ընկալումների, նա իր ստեղծագործության մեջ աստիճանաբար հանգեցնում է ճիշտ հակառակ գաղափարների:
Երբ ինչ որ տհաճ, փշոտ, տարօրինակ մարդիկ, որոնք ավելի շատ վանում են, մենք գրքի վերջում հանկարծ բացահայտում ենք, որ իրենց հանդեպ ավելի լավ ենք տրամադրված և նույնիսկ այն աստիճան է կոտրում կարծրատիպերը, որ դա սկսում է ազդել առհասարակ կյանքի վրա: Երբ որ շրջապատում էլ տեսնում ենք տարօրինակ մարդկանց` Բաքմանի պրիզմայիով, կամ արդեն սեփական պրիզմայով, բոլորովին այլ կարծիք ենք կազմում»:
Թարգմանչի բնութագրմամբ, եթե գիրքը մեկ բառով ներկայացներ, ապա կընտրեր՝ ամբիվալենտ եզրույթը, որովհետև, ինչպես հերոսուհին է հիշում, մի քանի անգամ այդ բառն օգտագործում, այստեղ և՛ հերոսներն են ամբիվալենտ, այսինքն՝ շատ հակասություն կա, անընդհատ երևում են անսպասելի կողմից, և՛ հերոսներն են այդպիսին, և՛ Բաքմանն ինքն այնպիսի իրավիճակներ է ստեղծում, որպեսզի մենք ավելի լավ հասկանանք ուղղությունը:
Գրքի խմբագիր Աննա Բախշյանը վեպը կարդալու և այն խմբագրելու ընթացքում զգացել է, որ ինչպես գրքի կերպարները, այնպես էլ հայերի տատիկ-թոռնիկ կապը շատ նման են միմյանց. «Ընդհանրապես աշխարհի բոլոր տատիկները, երևի, նման են, ու կապ չունի սկանդինավյան երկրներից են, թե մեկ այլ:
Երեխաները հատկապես մեր ժամանակներում զերծ են մնում ծնողական ուշադրությունից տարբեր պատճառներով, իսկ եթե քեզ բախտ է վիճակվել ունենալ նման էքսցենտրիկ, խենթ տատիկ, որի հետ ունես քո գաղտնիքները, քո գաղտնալեզուն, քո ամեն ինչը կարող ես վստահել նրան, դա ուղղակի հրաշալի է, և գրողը ճիշտ է ասում երեխայի լեզվով, որ տատիկը «և՛ սուր է, և՛ վահան»: Այդ տատիկի հետ կարելի է գնալ «հետախուզության», այսինքն՝ եթե դու տատիկ ունես, ուրեմն քո կյանքում ամեն ինչ ներառված է: Շատ գեղեցիկ, հուզիչ և ազդեցիկ պատմություն է»:
Գրքի գլխավոր գործընկերը «Բուկինիստն» է։ Շնորհանդեսին ներկա ընկերության կոմերցիոն տնօրեն Հեղինե Մեդոյանը նշեց, որ այս ֆորմատով Newmag-ի հետ գործակցությունն առաջին անգամ է և հուսով է, որ կլինի շարունակական. «Գիրքն ընտրել է Newmag-ի թիմը, մենք լիովին վստահել ենք Արտակին ու կարծում ենք, որ գիրքը մեծ հաջողություն կունենա: Երբ որ առաջարկվեց այս գիրքը, ծանոթ լինելով Բաքմանի մյուս գործերին ու նաև այս գործին, բայց ոչ հայերենով, մտածեցինք, որ գիրքը կընդունվի նաև հայ ընթերցողի կողմից և կունենա հաջողություն»:
Բանախոսները վստահեցրին, որ այս գիրքն անտարբեր չի թողնի ընթերցողներին, գուցե հավանեն, կամ չհավանեն, բայց անտարբել մնալ չեն կարող։ «Տատիկս բարևում է և ասում՝ կներեք» վեպն արդեն կարող եք գնել newmag.am կայքից և բոլոր գրախանութներից։
Կարդացեք նաև