Ինչ է պոպուլիզմը Նիդեռլանդներում. Գերտ Վիլդերս
Գերտ Վիլդերսի՝ երբեմն ծայրահեղ և հաճախ հակասական առաջարկները շատերն են քննադատում, բայց Վիլդերսը համակիրների պակաս չունի: Նա ստեղծել է իր քաղաքական կերպարը՝ կիրառելով պոպուլիզմի տարածված գործիքները:
Ով կամ ինչն է մեղավոր
Միգրանտները: Գերտ Վիլդերսի քաղաքական հիմնական խաղաքարտը միգրանտների դեմ պայքարն ու հակաիսլամական քարոզն է: Երկրում տնտեսական ճգնաժամ է` մեղավոր են միգրանտները: Նվազել է անվտանգության և բարեկեցության մակարդակը` պատճառը օտարներն են, որոնք աշխատատեղեր են զբաղեցնում: Իսլամաֆոբիան արտացվոլված է նույնիսկ Վիլդերսի կուսակցության մեկ էջանոց ընտրական մանիֆեստում: Ծայրահեղ աջերի առաջարկներն են՝ փակել մզկիթները, արգելել գլխաշոր կրել հանրային վայրերում ու դադարեցնել ներգաղթյալների հոսքը Նիդեռլանդներ: Վիլդերսն օգտվում է բնակչության հիմնավոր վախերից ու պնդում, որ միգրանտների ցունամին կանխելու ճանապարհը միայն ինքը գիտի:
Բարդ խնդիրներին հեշտ լուծումներ
Վիլդերսը դեմ է Եվրոպական Միությանը: Բրեքսիթին զուգահեռ նա առաջարկում էր Նեքսիթ (Brexit` Britain’s Exit, Nexit` Netherlands’s exit տրամաբանությամբ)` պնդելով, որ Մեծ Բրիտանիայից հետո Եվրամիությունը պետք է լքի նաև Նիդեռլանդները: Նեքսիթն իրականություն չդարձավ, 2019-ի եվրոպական ընտրություններում աջերի առաջնորդի կուսակցությունը կորցրեց Եվրախորհրդարանում իր բոլոր չորս տեղերը, բայց Եվրամիությունից անջատվելու գաղափարը շարունակում է մնալ քաղաքական օրակարգում:
Պոպուլիստ քաղաքական գործչի ընդդիմադիր արշավների ու կտրուկ հայտարարությունների նպատակը մեկն է` վստահություն ձեռք բերել ու դառնալ հակաիսթեբլիշմենթ: Վիլդերսին աջակցում են իշխանությունից հոգնած քաղաքացիները, որոնք ունեն, թեկուզ մեղմ, բայց աջ հայացքներ: Վիլդերսը վարպետորեն բաժանում է բնակչությանը երկու պարզ խմբի: Մի առիթով նա ասել է. «Նիդեռլանդների կեսը սիրում է ինձ, մյուս կեսն ատում է: Այլ տարբերակ չկա»: 2017-ին նրան սիրողների թիվը քիչ էր ընտրություններում հաղթելու համար: Աջ ծայրահեղականները զիջեցին լիբերալներին:
Կարդացեք նաև.
- Ինչ է պոպուլիզմը Բրազիլիայում. Ժաիր Բոլսոնարու
- Ամեն ինչ սկսվեց որպես կատակ. ի՞նչ է պոպուլիզմը Սերբիայում
- «Ինչ է պոպուլիզմ» ԱՄՆ-ում. Դոնալդ Թրամփ
Մեդիայի հետ հարաբերություններ
Վիլդերսին անվանում են Նիդեռլանդների Թրամփ ոչ միայն սանրվածքի ու աջ հայացքների, այլև սոցցանցերում ակտիվության համար: Լրագրողների հետ Վիլդերսի հարաբերությունները ջերմ չեն: Իր հիմնական մեսիջները պոպուլիստ գործիչը փոխանցում է թվիթերի միջոցով: Երբեմն խնդիրներ են լինում նույնիսկ այդ դեպքում: Հակաիսլամիստական քարոզի և ատելության խոսքի պատճառով Վիլդերսի թվիթերյան միկրոբլոգը մի քանի անգամ արգելափակել են:
Պոպուլիզմի լեզուն
Ատելության խոսք օգտագործելու ու քարոզելու պատճառով Վիլդերսը մի քանի անգամ դատական գործընթացների մեջ է եղել: 2010-ին նրան մեղադրեցին մուսուլմանների հանդեպ խտրական վերաբերմունքի մեջ, բայց դատարանը նրան արդարացրեց: 2016-ին արդեն մեղավոր ճանաչեց: Նրա հայտարարություններն ամեն տարի դառնում են ավելի անհանդուրժող:
Հեղինակ՝ Նանե Մանուկյան
Հետևեք newmag-ին Telegram–ում և Instagram–ում
Տարածել
Կարդա նաև
Անյես Մարտեն-Լյուգան. «Մեծ ուրախություն և հպարտություն եմ ապրում, որ իմ գրքերը հասել են հայ ընթերցողին» (տեսանյութ)
Newmag-ը ներկայացնում է բրիտանացի հայտնի հոգեթերապևտ Ջուլյա Սամուելի «Ամեն ընտանիք իր պատմությունն ունի» գիրքը (թրեյլեր)
Գիրք-ճանապարհորդություն տարածության և ժամանակի միջով՝ Փարիզից մինչև սենեգալյան հեռավոր մի գյուղ (տեսանյութ)
«Կյանքը Շառլի աչքերով» / Ազնավուրի անտիպ խոհերն ու խոստովանությունները նկարազարդ անթոլոգիայում (տեսանյութ)