Մարգարետ Միտչել. Համաշխարհային գրականության ամենատպավորիչ, զգացմունքային գրքի հեղինակի ծննդյան օրն է (տեսանյութ)

Միտչելը ծնվել է Ատլանտայում, 1900 թվականին։ Նրա հայրը՝ իրավաբան Յուջին Միտչելը, կառուցել է քաղաքի առաջին հանրային գրադարանը և հիմնել Ատլանտայի պատմության միությունը։ Մայրը խստաբարո և կիրթ իռլանդուհի էր, անդրդվելի կաթոլիկ։ Միտչելը 18 տարեկանում սիրահարվում է ամերիկյան բանակի մի երիտասարդ սպայի, որը զոհվում է Առաջին աշխարհամարտում։ Մեկ տարի անց գրիպը խլում է մոր կյնաքը։ Համալսարանական ուսումը կիսատ թողնելով՝ ապագա գրողը վերադառնում է ծննդավայր։

21 տարեկանում ծանոթանում է երկու երիտասարդի հետ և հանդիպում երկուսի հետ էլ։ Ռեդ Ապշոուն և Ջոն Մարշը նրան ժամադրում են, և նա որևէ մեկին չի մերժում։ Նույնիսկ պատահում է, որ մի ժամադրությունից վերադարձող Մարգարետին նրա տան մոտ սպասում է մյուս երկրպագուն։ Ի վերջո, Միտչելն ընտրում է Ռեդին: Ջոն Մարշը երջանիկ զույգի հարսանիքին դառնում է փեսայի խաչեղբայրը։  Պատմաբան Մոլի Հասկելը շատերի պես չհասկացավ Միտչելի ընտրությունը. «Ոչ-ոք չէր հասկանում, թե ինչու նա ընտրեց արբեցող, անհաջողակ և որոշակի իմաստով վտանգավոր այդ մարդուն»։

Ռեդը գործազուրկ էր, ուստի Մարգարետը որոշում է լրագրությամբ զբաղվել։ Ամուսինը մի քանի օրից անհետանում է, ամիսներ անց վերադառնալուց հետո սկսում է ծեծել, ու փորձում է նույնիսկ բռնաբարել։  Կյանքի այս դրվագի մասին ուսումնասիրություն է կատարել պատմաբան Էեթրին Կլարկը. «Բռնաբարության այդ էպիզոդը ավելի ուշ Միտչելն օգտագործում է վեպում, բայց մեկ տարբերությամբ՝ Սկարլետը, պարտադրված սիրային գիշերից հաճույք է ստանում, ի տարբերություն վեպի հեղինակի անձնական փորձի»։

Միտչելը մեկ տարի անց ապահարզան է պահանջում։ Երեք տարի անց՝ 25 տարեկանում ամուսնանում Ջոն Մարշի հետ։ Հենց Ջոն Մարշի օգնությամբ ու խրախուսմամբ, Միտչելը մեկ տարի անց սկսում է գրել իր լեգենդար վեպը, որի առաջին ընթերցողն ու խմբագիրը ամուսինն էր։ Երբ վեպը հրատարակվում է, Ջոնը դառնում է Մարգարետի գործերի կառավարիչը։ Միտչելի հաջողությունը չի փոխում ամուսինների հարաբերությունները։ Ավելին, նրանք երկուսով պատասխանում են բազմաթիվ ընթերցողների նամակներին։ Միտչելը պատասխանել է բոլորին։ Անխտիր։ Տարիներ շարունակ։

Գրողը ֆինանսավորում է Ատլանտա տիպի 2 հածանավի արտադրությունը և մասնակցում է ռազմանավի օծման հանդիսավոր արարողությանն ու ջուրն իջեցնելու ռազմական ծիսակարգին։ Այս մասին պատմում է նաև Մարգարետ Միտչելի կենսագիրը՝ Մարիեն Ուոկերը. «Երկրորդ աշխարհամարտի տարիներին նա օգնում է պատերազմից տուժած ընտանիքներին։ Դառնում է Կարմիր խաչի կամավոր»։ Միտչելը 1942-ին նամակ է ստանում դոկտոր Բենջամին Մեյսից։ Նա խնդրում էր օգնել, որ սևամորթ երիտասարդները համալսարանական կրթություն ստանան։ Մեյսն ազդեցիկ գործիչ էր։ Նա ավելի ուշ դառնալու էր Մարտին Լյութեր Քինգի մենթորը։

Այդպես սկսվում է Մարգարետի և Բենջամինի երկար տարիների գաղտնի գործակցությունը։ Մեյսն ուղարկում էր գումարի չափը, գրողն էլ գումարն անմիջապես փոխանցում էր բանբերին։ Մինչև իր կյանքի վերջ Միտչելը գաղտնի օգնում է սևամորթ ուսանողներին, հետո ֆինանսավորում սևամորթների համար նախատեսված առաջին հիվանդանոցի շինարարությունը։ Հենց այդ տարիներին՝ 1945-ին սրտի կաթված է ստանում Միտչելի ամուսինը և դառնում անկողնային հիվանդ: Միտչելը 2 տարի խնամում է ամուսնուն և ոտքի կանգնեցնում։ Բայց նրանց կյանքը փոխվում է։ Նրանք հազվադեպ են դուրս գալիստնից, և նախընտրում են միայն կինոթատրոն գնալը։

Կարդացեք նաև

• Newmag-ը ներկայացնում է «Քամուց քշվածները». Հատոր առաջին (թրեյլեր)
• Տեղի ունեցավ Մարգարետ Միտչելի «Քամուց քշվածները» գրքի հեռուստաշնորհանդեսը (լուսանկարներ, տեսանյութ)

Հենց այդպիսի մի օր էլ, 1949 թվականի օգոստոսի 11-ին, երբ ամուսինները անցնում էին փողոցը՝ կինոթատրոն մտնելու համար, մեքենան վրաերթի է ենթարկում երկուսին էլ։ 5 օր կոմայում մնալուց հետո Մարգարետ Միտչելը մահանում է։ Նա ընդամենը 48 տարեկան էր։ Եվ կտակում՝ որպես վերջին խնդրանք իր ամուսնուն հորդորում է այրել «Քամուց քշվածների» ձեռագիրը։ Ջոն Մարշը այդպես էլ վարվում է՝ թողնելով մի քանի էջ՝ որպես ապացույց։ Ապացույց, որ իր կինը գրել է 20-րդ դարի գլուխգործոներից մեկը, աշխարհին պարգևել դարակազմիկ վեպ և կերտել է հերոսներ, որոնց  հմայքը չի խամրում։