Տեղի ունեցավ Մորգան Հաուզելի «Փողի հոգեբանությունը» գրքի հեռուստաշնորհանդեսը (տեսանյութ)

«Փողի հոգեբանությունը» գիրքը փողի, հարստանալու, երջանկության ու ագահության մասին է։ Գրքի գլխավոր գործընկերը «Էփրիքոթ Կապիտալ» ներդրումային ընկերությունն է։

Մորգան Հաուզելի՝ ֆինանսական գրագիտության մասին այս գիրքն ու խորհուրդներն այնքան են ազդել թարգմանիչ Անուշ Սեդրակյանի վրա, որ որոշել է առանձին հաշիվ բացել ու եկամուտների 10 տոկոսը հավաքել այդ հաշվի վրա. 

«Չնայած ասեմ, որ դեռ չի ստացվում հետևել գրքի ամենակարևոր խորհուրդներից մեկին` քիչ ծախսել ու խնայողություններ անել»:

Ըստ Անուշ Սեդրակյանի, հեղինակը շատ օբյեկտիվ է և առանձնացնում է գրքի ամենակարևոր սեգմենտը՝ «ամեն ինչ այնքան վատ չէ, ինչպես թվում է, ամեն ինչ այնքան լավ չէ, ինչպես որ թվում է».

«Իհարկե, վախենում էի, որ տնտեսագետները գիրքը բացելուց հետո կասեն այսինչ տերմինը սխալ եմ թարգմանել, բայց ոչ, արձագանքները դրական են: Ընթերցելու պահով հատվածներ կան, որ շատ ֆինանսական են, բայց կոնսուլտացիայի համար զանգահարում էի իմ տնտեսագետ ընկերներին ու խնդրում, որ ինձ այդ ամենը հայերեն, «մարդկային» լեզվով բացատրեն»։ 

«Էփրիքոթ Կապիտալի» մարկետինգի ղեկավար Լենա Գյուլխասյանը պատմեց, թե ինչու է ընկերությունը որոշել աջակցել նման գրքի հրատարակմանը.

«Քանի որ մենք լիցենզավորված բրոկերային ընկերություն ենք, այսինքն՝ միջնորդ օղակ մարդկանց համար, ովքեր ունեն գումար և ուզում են գումարն ավելացնել, և ֆինանսական շուկաների, որոնք առաջարկում են գործիքներ դա անելու համար: Եվ որպեսզի մեր ընկերությունը զարգանա և ավելանան մեր հաճախորդները, կարիք կա Հայաստանում զարգացնել  ֆինանսական ներդրումների մշակույթը, որը դեռ ձևավորման փուլում է».

Լենա Գյուլխասյանի խոսքով, ընկերությունն իր վրա է վերցրել այդ հանձնառությունը, և հենց ընկերությունն էլ պետք է նպաստի պատասխանատու ներդրումային մշակույթի ձևավորմանը. 

«Շատ կարևոր է, որպեսզի մարդիկ գիտակցված գան այդ քայլին՝ ներդրումներ անելուն, և մենք նկատեցինք, որ կա հայալեզու նյութերի պակաս։ Newmag-ին առաջարկեցինք թարգմանել ու հրատարակել այս գիրքը: Հեղինակը կյանքից վերցված պատմությունների միջոցով բացատրում է ֆինանսական թեմաները, տերմինները».

Բանախոսները խորհուրդ են տալիս կարդալ գիրքը, որը շատ հանրամատչելի է, և մարդկանց փոխանցում է բազմաթիվ օգտակար ու ֆինանսական գաղափարներ:

Կարդացեք նաև

• Newmag-ը հայերեն է հրատարակել Մորգան Հաուզելի հեղափոխական գիրքը՝ «Փողի հոգեբանությունը» (թրեյլեր)
• Ինչպես սիրել փողը, մտածել փողի մասին ու աշխատել փող. տեղի ունեցավ «Փողի հոգեբանությոնը» գրքի շնորհանդեսը (լուսանկարներ)
• Ինչպե՞ս դառնալ միլիոնատեր. 10 միտք «Փողի հոգեբանությունը» գրքից (տեսանյութ)