Սյունե Սևադա. «Գրելու մեջ ամենակարևորն անկեղծությունն է» (լուսանկարներ)

Գրական առաջին ու փոքր գործերը Սյունե Սևադան նախ գրել է իր բլոգում, հետո արդեն  2019-ին տպագրեց առաջին գիրքը՝ «Կախվածությունը» պատմվածքների ժողովածու, որը վերահրատարակվեց մի քանի անգամ։ Երեք տարի անց լույս տեսավ նրա երկրորդ գիրքը, բայց արդեն վեպ` «Աղի թեյը». «Պատվածքից անցումը դեպի վեպին մի քիչ բարդ է, բայց իմ դեպքում բավականին հարթ եղավ։ Եթե զգայի, որ վեպ գրելը չի ստացվում, հանգիստ կսկսեի նորից պատմվածք գրել։ Գուցե մի քիչ բախտի հարց է, մի քիչ տեխնիկայի, նայած թե ինքդ ինչպես ես քեզ վերաբերվում»։    

Պատմվածքների իր ժողովածուն ներառում է 24 գործ։ Թիվը պատահական չէ, քանի որ հրատարակման տարում գրողը հենց 24 տարեկան էր։ Ստեղծագործելը դարձավ նրա համար ապաքինման միջոց. «Ես առհասարակ սկսել եմ գրել որպես բուժման միջոց։ Գրելը թերապևտիկ գործիք է, գիտեմ, որ հոգեբաններն էլ են մարդկանց խորհուրդ տալիս գրել, օրագիր պահել և այլն։ Այդ ալտերնատիվ իրականությունը գրելով՝ դու հասկանում ես իրականում քեզ ինչ է պետք»։  

Ըստ Սյունեի, գրողը պետք է անդրադառնա նաև ժամանակակից խնդիրներին, այն իրականությանը, որտեղ ապրում է, փոխանցի այն ցավը, որը զգում են մարդիկ, միայն թե շատ զույշ. «Այսօրվա խնդիրները պետք է գրվեն որակյալ, չպետք է պարզապես լինի պաթոսով գրառում։ Պետք է զգալ պաթետիզմի և իրական զգացմունքների սահմանը հայրենասիրական թեմայով գրելիս։  Ընդհանրապես գրականությունը պետք է անդրադառնա երկրի խնդիրներին, բայց պետք է անել շատ զգույշ, պետք է լինել շատ անկեղծ, որ ընթերցողին սփոփի, լավատեսություն հաղորդի, հույս տա»։  

Վերջում խորհուրդ երիտասարդ ու սկսնակ գրողներին. «Եթե գրելուց նպատակդ միլիոնատեր դառնալն է, պետք չէ, մեր նպատակը պատմելը պետք է լինի։ Գրելը մասնագիտություն է, և միայն ժամանակը կարող է ցույց տալ ով է գրող, ով՝ ոչ։ Գրելը բավականին ծանր աշխատանք է։ Չպետք է տրվել ալիքին, որ աստղ ես, բեսթսելլեր ես. դրսնք ժամանակավոր բաներ են»։  

Գրքի ու գրողի հաջողությունը ոչ թե ժանրն է, ոճը կամ թեման, այլ անկեղծությունը, ինչն էլ հենց առաջինն է զգում ընթերցողը։ 

Կարդացեք նաև

• Newmag Summer Fest-ին տեղի կունենա Սյունե Սևադայի «Աղի թեյ» վեպի շնորհանդեսը (թիզեր)
• Newmag Summer Fest-ին տեղի ունեցավ Սյունե Սևադայի առաջին վեպի շնորհանդեսը (տեսանյութ, լուսանկարներ)
• «Ինքս անցա այդ ամենի միջով»․ Սյունե Սեւադայի «Աղի թեյ» գրքի շնորհանդեսը
• 5 պատճառ՝ ինչու պետք է կարդալ «Աղի թեյ» գիրքը (լուսանկարներ)
• Կյանքը մանրիկ երջանկությունների ու մանրիկ փորձությունների մի շղթա է, որը... կոփում է կամ կոտրում՝ ըստ մեր ընտրության. այսօր Սյունե Սևադայի տարեդարձն է
• «Երևանյան բեսթսելեր». «Աղի թեյը»՝ առաջատար. հայ գրականություն. օգոստոս, 2022
• Կանայք, գիրք ու գինի ձևաչափով հանդիպում կին ընթերցասերների ակումբում (լուսանկարներ)