Նոր գրքեր պատանիների համար. Newmag-ը 12+ երեխաների համար ներկայացնում է երկու գիրք (տեսանյութ)

Հեռուստաշնորհանդեսին ներկա էին «Երազ»  մատենաշարի ղեկավար Գոհար Մանուկյանը, «Մթության մեջ տեսնող տղան» գրքի թարգմանիչ Նաիրա Խաչատրյանը և «Լիալուսնի գաղտնիքը» խոհափիլիսոփայական ֆանտաստիկ վեպի հեղինակ Քրիստինա Սիմոնյանը։

Նոր գրքերից՝ «Մթության մեջ տեսնող տղան», լույս է տեսել «Երազ» մատենաշարով։ Երազ մատանաշարի ղեկավար Գոհար Մանուկյանը պատմեց, թե պատանի հայ ընթերցողների ինչպես են ընտրում ու հրատարակում գրքեր. 

«Այս երկու գրքերը, թե՛ ժանրով, թե՛ պատմությամբ շատ կհետաքրքրեն պատանիներին։ Եթե փոքրիկ ընթերցողների դեպքում մենք հրատարակում ենք գրքեր, որոնք օգնում են բացահայտել աշխարհը, սիրել գիրքը, պատանիների դեպքում խնդիրները այլ են։ Այս տարիքում պետք է հասկանալ նրանց, նրանց ներաշխարհը, կարողանալ վստահություն ձեռք բերել։ Այս երկու գրքերն էլ ընտանեկան, ընկերական ջերմ հարաբերությունների մասին են, սովորեցնում են վստահել, սիրել ու հասկանալ մարդկանց։ 

Գրքերը նաև կօգնեն ինքնաճանաչման հարցում, քանի որ այդ բարդ փուլում սա շատ կարևոր է։ Վիճակագրությամբ, մոտ 10 տարի առաջ հայ պատանիների  60 %-ն էր ակտիվ ընթերցում, իսկ այսօր՝ մոտ 35 %-ը։ Այսինքն, մեր գրքերը պետք է լինեն նաև գրավիչ ու հետաքրքիր, որպեսզի այս տարիքային շեմի երեխաները, պատանիները ցանկանան կարդալ»։

Գոհար Մանուկյանը կարծում է, որ շատ կարևոր է նաև գրքերի լեզուն։ Այն պետք է լինի պարզ, հասկանալի, կենդանի, բայց նաև շատ գեղեցիկ, աչք շոյող դիզայնով, որպեսզի գաջեթների, կարճ հաղորդագրությունների ու հոլովակների դարաշրջանում հնարավոր լինի գրավել պատանիների ուշադրությունը. 

«Փորձում ենք հասկանալ, թե ինչ է պետք այդ տարիքի երեխաներին։ Մենք առաջիկայում կներկայացնեք, օրինակ, իսպանական մանկական գրքեր, որովհետև դրանք շատ մեծ հետաքրքություն են առաջացրել միջազգային գրական շուկայում»։

Լատվիացի դրամատուրգ, գրող Ռասա Բուգավիչուտե-Պեցեի «Մթության մեջ տեսնող տղան» վեպը ներկայացրեց թարգմանիչը՝ Նաիրա Խաչատրյանը. «Գիրքն իրական դեպքերի հիման վրա է, հեղինակը գրել է իր ամուսնու մասին։ Պատմությունը հետաքրիքր է, բարդ, ուսուցողական։ Պատմությունն առաջին դեմքով է, տղան պատմում է, որ մեծանալով ստիպված դարձել է իր ծնողների աչքերը, ձեռքերը։ Ծնողներն ապրում են մթության մեջ ու այդ ամենը ներկայացված է շատ հուզիչ ու հետաքրքիր սյուժեյով»։

Գրքի թարգմանիչը պատմեց, թե ինչպես է Newmag հրատարակչության հետ ընտրել գիրքը. «Ես դպրոցական տարիքում երազել եմ դառնալ լրագրող, իսկ Newmag-ի անձնակազմը լրագրողներ են, մենք ընտրում ենք գրքեր, որոնք ոչ միայն հետաքրքիր են, այլ նաև հրատապ ու ակտուալ թեմաներ են արծարծում։ Այս գիրքը ցույց է տալիս կույրերի խնդիրները։ 

Գրքի միջոցով պարզ կտեսնեք, թե ինչպես են ապրում կույր մարդիկ, ինչպես են դուրս գալիս տնից, ինչպես են կազմակերպում իրենց առօրյան, ինչ բարդությունների են հանդիպում, օրինակ եթե որևէ վարորդ իր մեքենան սխալ տեղում է կայանում, ինչ բարդություններ են առաջանում նրանց համար։ Շատ կարևոր է նաև հասարակության վերաբերմունքը։ Այս նուրբ խնդիրը նույնպես շատ լավ ներկայացված է գրքում»։

«Լիալուսնի գաղտնիքը» ներկայացրեց հեղինակը՝ Քրիստինա Սիմոնյանը։ Գիրքը բացահայտվում է վեպի ամբողջ ճամփորդության ընթացքում՝ քարտեզի նման գծելով հորը փնտրող հերոսուհու ճանապարհը՝ լի խորհելու տեղիք տվող իրադարձություններով, որոնք կողմնացույցի դեր են կատարում իր և ընթերցողի համար.

Հեռուստաշնորհանդեսին նա պատմեց, թե ինչու է գրել հատկապես խոհափիլիսոփայական ֆանտաստիկայի ժանրում. «Հենց դրա միջոցով կարողանում ես քողարկված իրողության մեջ իմաստնություն փոխանցել, քանի որ ընթերցողը ոչ միայն կարդում է, այլ նաև զգում է։ Դա ներթափանցում է նաև գիտակցություն, մենք սովորում ենք այդ պատմությունների միջոցով։ 

Իմ գրքի հերոսները տարբեր հետաքրքրություններ ունեցող մարդիկ են, որոնք ինչ-որ փնտրտուքների մեջ են, ունեն չիրականացած երազանքներ ու անպատասխան հարցեր։ Իսկ գիքրը լի է խորհրդավոր կերպարներով, որոնք ընթերցողի առաջ կբացեն նորանոր գաղտնիքներ։ Գրքում կարմիր թելով անցնում է վերափոխման կամ փոխակերպման գաղափարը։ 

Գիրքն առանձնահատուկ է նրանով, որ ընթերցողը կարող է տեսնել շաղ տված մարգարտահատիկներ իմաստուն մտքերի տեսքով։ Ընթերցողը նաև կբացահայտի, որ հերոսի ճամփորդությունը վերաբերում է նաև իր կյանքին։ Եվ այս ճամփորդությունը դեպի դուրս է ու դեպի ներս։ Գաղտնիքն այն է, որ եթե ուզում ես ինչ որ բան փոխել դրսում, պետք է սկսես քո կյանքից»։

Քրսիտինա Սիմոնյանն ասում է, որ իր գիրքը տարիքային սահմանափակում չունի։ Վեպը ընթերցողին պետք է սովորեցնի կարևոր արժեքներ՝ խիզախություն, լսել հոգու ձայնն ու հետևել։ Գրքերը վաճառվում են newmag.am կայքում և գրախանութներում։

Կարդացեք նաև

• Newmag & friends ծրագրի շրջանակում ներկայացնում ենք Քրիստինա Սիմոնյանի «Լիալուսնի գաղտնիքը» գիրքը (թրեյլեր)
  
• Newmag-ը հրատարակել է նոր գիրք պատանիների համար. «Մթության մեջ տեսնող տղան» (թրեյլեր)