Ինչպե՞ս դառնալ ավելի արդյունավետ. 5 խորհուրդ Չարլզ Դահիգից (տեսանյութ)
«Ավելի խելացի, արագ, հաջողակ» գրքի հեղինակն օրերից մի օր հասկացավ, որ աշխատանքի համար ժամանակը միշտ քիչ է, սովորաբար չի հասցնում ժամկետների մեջ տեղավորվել, անվերջ ցայտնոտի և վազվզոցի մեջ է: Ըստ Դահիգի, արդյունավետ լինելու համար պարտադիր չէ ավելի շատ ջանք ու քրտինք թափել: Արդյունավետությունը պարզապես գրասեղանի դիմաց ժամեր անցկացնելու կամ ավելի մեծ զոհողությունների արդյունք չէ: Ինչպես հասնել արդյունավետության՝ հեղինակը բոլոր փակագծերը բացում է գրքում:
Արդյունավետությունն, ըստ Դահիգի, ապրելակերպ է, որի ընթացքում սովորում ենք հաջողության հասնել նվազագույն լարումով ու ճիգով, որ կարողանանք բոլոր գործերը ժամանակին ավարտել՝ չզոհաբերելով դրանց համար այն ամենն, ինչ մեզ համար կարևոր է ու թանկ: Կան մարդիկ, որոնք գիտեն արդյունավետ գործելու գաղտնիքը՝ իր «Ավելի խելացի, արագ, հաջողակ» գրքում պնդում է նա:
1. Երբ առավոտյան աշխատանքի եք գնում, մտքում պատկերացրեք ձեր օրը, ստեղծեք մի բանաձև, որին հետևելու եք օրվա ընթացքում: Մտովի որոշեք, թե ինչ եք ակնկալում հասցնել 24 ժամում: Այդ կերպ կհստակեցնեք առաջնահերթություններն ու կանտեսեք երկրորդական, շեղող հանգամանքները:
2.Կայացրեք որոշումներ, որոնք թույլ կտան հավատալ, որ ամեն ինչ ձեր ձեռքում է: Օրինակ, երբ պատասխանում եք էլեկտրոնային նամակները՝ ցույց տվեք, որ դուք եք դրության տերը. ինքներդ որոշեք հանդիպման վայրը կամ առանց արդարանալու մերժեք այն առաջարկը, որն այնքան էլ ձեր սրտով չէ: Այստեղ կարևոր են ոչ այնքան որոշումները, որքան իրադրության տերը լինելու զգացումը:
3. Երբ նոր բան եք սովորում և ուզում եք մտապահել այն, ապա փորձեք այդ գիտելիքը փոխանցել մեկ այլ մարդու: Տեղեկությունը գիտելիքի վերածելու համար կարևոր է որևէ կերպ օգտագործել այն կամ գոնե խոսել դրա մասին:
4. Աշխատավայրում թիմի հետ հանդիպման ընթացքում ուշադրություն դարձրեք, թե ինչպես են ձեր գործընկերները դրսևորում իրենց: Արդյունավետությունն առաջին հերթին կախված է թիմի ներսում անկաշկանդ և համարձակ քննարկումներից: Սա կոչվում է հոգեբանական անվտանգություն: Թիմի անդամներն զգում են, որ պաշտպանված են և չեն վախենում արտահայտել իրենց կարծիքը:
5. Երբ անելիքների ցանկ եք կազմում, վերևի հատվածում գրեք ձեր ամենամեծ նպատակների մասին, որոնք անընդհատ կհիշեցնեն, թե ինչ ուղղությամբ եք ուզում շարժվել: Ներքևի հատվածում գրեք ձեր ողջամիտ նպատակները, որոնք հստակ են, չափելի, իրագործելի, իրատեսական և ունեն հստակ ժամանակացույց: Երբ նպատակը ձևակերպված է, առաջին քայլն էլ հստակեցված՝ ամեն ինչ էլ կարվի:
Կարդացեք նաև
- [Նոր գիրք]. «Ավելի խելացի, արագ, հաջողակ»՝ մոտիվացիոն գիրք «Սովորության ուժի» հեղինակից (թրեյլեր)
- Չարլզ Դահիգ. Արդյունավետությունն ի հայտ է գալիս այն ժամանակ, երբ մարդիկ սկսում են այլ կերպ մտածել (լուսանկարներ)
- Տեղի ունեցավ Չարլզ Դահիգի «Ավելի խելացի, արագ, հաջողակ» գրքի շնորհանդեսը (տեսանյութ, լուսանկարներ)
- Ինչու է Չարլզ Դահիգը գրել «Ավելի խելացի, արագ, հաջողակ» գիրքը և ինչու է մեզ սովորեցնում արդյունավետ աշխատել (տեսանյութ)