«Ճշմարտությունը Հարի Քվեբերտի գործի մասին» հանրահայտ վեպի հաջողված սերիալը (տեսանյութ)

Այսօր մեծ գրող ես, վաղը՝ հռչակավոր մեղադրյալ: Ժոել Դիկերի վեպը դարձավ նույնքան պոպուլյար սերիալ: Գլխավոր հերոսը՝ Մարկուս Գոլդմանը, փորձում է հաղթահարել սպիտակ էջի բարդույթը ու միաժամանակ փրկել ընկերոջը, որին մեղադրում են 30 տարի առաջ Նոլային սպանելու մեջ: Քրեական բացահայտումից կծնվի նոր գիրք, ու ոգեշնչումը կրկին կայցելի գրողին:  

Մեկ սեզոն, տասը դրվագներում սցենարիստները փորձել են գրողից հետ չմնալ ու կերպարների բնավորությունները, վարքն ու արարքները զգուշորեն և անտեսանելի թելերով կապել տասնյակ մյուս հերոսների հետ, որոնք բոլորը կարծես թե կապ ունեն երիտասարդ աղջկա մահվան հետ: Անընդհատ նոր վարկած ու մի քանի դրվագ հետո՝ միանգամայն նոր վարկած, որը ջնջում է նախորդ կասկածները: Ու այդպես՝ մինչև վերջին դրվագը: 

Գլխավոր հերոսին՝ Մարկուսին մարմնավորում է Պատրիկ Դեմպսին:  Ֆիլմի ռեժիսորը Ժան Ժակ Աննոն է․ սա նրա դեբյուտային ֆիլմն է: Ռեժիսորը ֆիլմի  իրադարձությունները կառուցել է երկու զուգահեռ ժամանակշրջաններում: Առաջինը 33 տարի առաջ կատարված դեպքերն են․  Հարի Կվեբերտը ծանոթանում է երիտասարդ ու խորհրդավոր գեղեցկուհու՝ Նոլայի հետ: Երկրորդ ժամանակաշրջանում Հարիին մեղադրում են տարիներ առաջ Նոլային սպանելու մեջ:    

Դետեկտիվի սյուժեն ծավալվում է դանդաղ, բոլոր վարկածները, ապացույցներն ու մոտիվները նկարագրված են մանրակրկիտ ու հանգամանալից: Ֆիլմը դիտողը կարծես մասնակցում է Հարի Քվեբերտի առեղծվածային գործի քննությանը:  

Սատանան, ինչպես միշտ, թաքնված է մանրուքներում: Ֆիլմը, ինչպես և «Ճշմարտությունը Հարի Քվեբերտի գործի մասին» գիրքը, շունչ քաշելու ու որևէ տարբերակ կանխատեսելու հնարավորություն չի թողնում մինչև վերջին դրվագի վերջին րոպեն: 

Կարդացեք նաև

• FRANCOFEST | Newmag-ը ներկայացնում է գրական սենսացիա՝ Ժոել Դիկերի «Ճշմարտությունը Հարի Քվեբերտի գործի մասին» գիրքը (թրեյլեր)
• Տեղի ունեցավ «Ճշմարտությունը Հարի Քվեբերտի գործի մասին» դետեկտիվ վեպի հեռուստաշնորհանդեսը (տեսանյութ)
• Ով է Ժոել Դիկերը՝ «Հարի Կվեբերտի» գործի մասին գրքի հեղինակը (տեսանյութ)