Տեղի ունեցավ «Արտաքսում. Դեպի անհայտություն» գրքի հեռուստաշնորհանդեսը (տեսանյութ, լուսանկարներ)

Բաքվի ջարդերի վավերագրություն՝ առաջին դեմքից: Իր ընտանիքի պատմությունը Աննա Աստվածատուրյան Թերքոթը նախ գրեց օրագրում, հետո օրագիրը դարձրեց գիրք: Ի սկզբանե Աննան «Արտաքսում. Դեպի անհայտությունը»  գրել է իր երեխաների համար, որպեսզի նրանք կարդան ու իմանան իրենց ընտանիքի պատմությունը ու նաև երբեք չմոռանան, թե ինչպես են վարվել ադրբեջանցիները Բաքվում հայերի հետ. «Երեխաներս դեռ շատ փոքր էին, երբ հրատարակվեց գիրքս անգլերենով: Տղաս 6 տարեկան էր այդ ժամանակ, և ես չցանկացա, որ այդ տարիքում նա իր մոր մասին այդքան զգացմունքային գիրք կարդա: Ի վերջո, երեխաներս գիրքս կարդացին 13-15 տարեկանում: Հիմա նրանք գիտեն իրենց ազգի պատմությունը, ու թե ինչի միջով է անցել մեր ընտանիքը»:

 

Թարգմանիչ Անուշ Մուրադյանը գրքից առանձնացնում է այն հատվածները, որտեղ Աննան պատմում է՝ ինչպես էր Բաքվում թաքցնում իր հայ լինելը: Խոստովանում է, որ դժվար էր վերապրել ծանր բովանդակությունը. «Որքան հեշտ էր թարգմանելը, նույնքան ծանր էր որպես ընթերցող: Այնքան մանրամասն է նկարագրել, որ թվում էր՝ դու այնտեղ ես, դու քեզ նույնացնում ես հերոսի հետ ու վերապրում ամբողջ սարսափը»:

 

«Արտաքսում. Դեպի անհայտություն»  գրքի խմբագիր Արմեն Ամիրխանյանը նշում է՝ Աննա Աստվածատուրյան Թերքոթի գրքի գլխավոր ուղերձներից մեկը ինքնության համար պայքարն է. «Աննայի գիրքը վավերագրում է մեկ ընտանիքի օրինակով ամբողջ իրավիճակը, այդտեղ հայրը կանգնած դանակով պաշտպանում է ի իր ընտանիքը ու դա հայկական ինքնության կռիվ է»:

 

Հայաստանի Մարդու Իրավունքների առաջին պաշտպան Լարիսա Ալավերդյանը նույնպես Բաքվում է ծնվել և սեփական աչքերով է տեսել Ադրբեջանի ցեղասպան քաղաքականությունը: Նրա համոզմամբ՝ հերոսություն է ջարդերը վերապրելուց հետո այդ մասին գիրք գրելը. «Ես չէի կարող գրել, լսելով այդ 40 տարիների ընթացքում լսելով ու վերապրելով, տեսնելով փախստականներին ես չեմ կարողանում դրա մասին գրել, դա հերոսություն է»:

 

Անգլերեն և ռուսերեն հրատարակություններից հետո «Արտաքսում. դեպի անհայտություն գիրքը» newmag-ը թարգմանել է հայերեն: Ինտենսիվ գրքարշավի ժամանակ Աննան հանդիպել է հայ ընթերցողների հետ ու խոսել իր գրքի մասին, մասնակցել գրքի շնորհանդեսին ու հանդիպել Հայաստանում տարբեր բուհ-երի ուսանողների հետ: Գրքարշավի վերջին օրը՝ նոյեմբերի 5-ին, Newmag-ն Աննա Աստվածատուրյան Թերքոթի գիրքը կներկայացնի նաև Գյումրիում:

Կարդացեք նաև

• Newmag-ը ներկայացնում է Բաքվի ջարդերի մասին ամերիկահայ գրող Աննա Աստվածատուրյան Թերքոթի «Արտաքսում. Դեպի անհայտություն» գիրքը (լուսանկարներ)
• Իր գրքի շնորհանդեսի առիթով Հայաստանում է ամերիկահայ գրող Աննա Աստվածատուրյան Թերքոթը (թրեյլեր, գրքարշավի ժամանակացույց)
• Արմենպրեսում տեղի է ունեցել Աննա Աստվածատուրյան Թերքոթի մամուլի ասուլիսը (տեսանյութ, լուսանկարներ)
• Տեղի ունեցավ Աննա Աստվածատուրյան Թերքոթի «Արտաքսում. Դեպի անհայտություն» գրքի շնորհանդեսը (տեսանյութ, լուսանկարներ)
• Աննա Աստվածատուրյան Թերքոթի բացառիկ հարցազրոյցը՝ Голос Армении-ին (լուսանկարներ)