«Ռոջավա»՝ պատերազմից ավերված տարածքում ձեռք բերված ինքնության ու սիրո մասին պատմություն (տեսանյութ)

Սիրիական Քրդստանի Ռոջավա շրջանում Երևանում ծնված Նանեն դառնում է ազատության մարտիկ: Նրա պատմությունը հաճախ ուղիղ, երբեմն էլ փոխաբերական շերտերով համադրվում է քուրդ կանանց պայքարի հետ՝ պատմում է գրքի հեղինակը. «Քուրդ կանանց ջոկատի և Ռոջավայում զարգացումների մասին սկսեցի կարդալ 2014-ին, երբ թերթերում հայտնվեցին առաջին լուրերը: Դրանք անմիջապես գրավեցին իմ ուշադրությունը։ Այդ զինված կանանց պատկերները՝ զինվորական հագուստով, հրացաններով, անապատի մեջտեղում, դաջվեցինհիշողությանս մեջ։ Այդ ընթացքում ես գրեցի իմ երկու գրքերը, և երբ ավարտեցի, Ռոջավա շրջանը դարձել էր լրատվամիջոցների գլխավոր թեման: Հասկացա, որ պահը եկել է»:

Քուրդ կանանց պայքարը նկարագրելիս կռիվ կամ պատերազմ բառի փոխարեն «Ռոջավա» գրքի հեղինակը նախընտրում է դիմադրություն եզրույթը: Սա ավելին է, քան զինված հակամարտությունը. «Ջիհադիստները շահարկում են Ղուրանը, թիրախավորում են արձակած մազերով կանանց, նրանց հիմնարար իրավունքներն են խախտում, աջ ու ձախ արգելքներ են մտցնում: Այս կանանց զինված պայքարը նաև պատրիարխալ հասարակության դեմ է: Իրենց հեղափոխական դիմադրությամբ փորձում են քանդել այն նեխած հասարակարգը, որում դաստիարակվել են»:

Մագդա Թախտաճյանը գրքի երեք առանցքային նպատակ է առանձնացնում՝ արդարության որոնումներ, ճշմարտության համար պայքար և հիշողության պահպանում: Գլխավոր հերոսուհի Նանեն գնում է իր արմատների հետևից և սա ինքնությունը պահպանելու գլխավոր նախապայմանն է. «Ամեն ինչի հիմքում ԴՆԹ-ն է, արմատները, տեղեկատվական այն միջուկը, որ կա մեր բջիջներում: Դա այն ճանապարհն է, որը նաև ես եմ անցնում: Դա անվերջանալի ճանապարհ է: Մենք նախ արմատավորվում ենք և հետո միայն այդ կետից տարածվում, լուսավորում ու ստեղծում»:

Սփյուռքահայ շատ հեղինակներ կան, որ ստեղծագործում են որևէ լեզվով, բայց այդպես էլ այդ երկրի մշակույթի ու գրականության մաս չեն դառնում: Մագդա Թախթաճյանը համոզված է՝ իր գրքերը արգենտինական ժամանակակից գրականության մաս են դարձել: Քննարկվող խնդիրներն ու երևույթները մարդկանց համար ընկալելի և հետաքրքիր են.

«Այո՛, իմ գրքերն ինտեգրվել են արգենտինական գրականության մեջ։ Կան երկրի բոլոր գրախանութներում, և բարեբախտաբար, շատ լավ են վաճառվում թե՛ հայ, թե՛ այլազգի ընթերցողների շրջանում։ Ընթերցողներից շատերն ինձ խոստովանում են, որ իմ գրքերը կարդալուց հետո համարձակվում են ուսումնասիրել իրենց ծագումը, փնտրել արմատները, անկախ նրանից՝ հա՞յ են, թե՞ ոչ: Մարդիկ նաև տեղյակ չեն Մերձավոր Արևելքի և Հարավային Կովկասի բարդ խնդիրների մասին և այս կերպ հաղորդակից են դառնում նաև դրանց։ Ընթերցանությունը ժամանցի ձև է, բայց նաև մտածելու, փնտրելու և սովորելու միջոց է»:

Կարդացեք նաև

• «Օտարագիր հայ գրողներ. Ովքեր են ու ինչի մասին են գրում թեմայով» պանելային քննարկում՝ Newmag Winter Fest-ին (լուսանկարներ)
• Արգենտինահայ գրողը այցելել է Բրյուսովի համալսարան և շփվել իսպանախոս ուսանողների հետ (տեսանյութ, լուսանկարներ)
• Արգենտինահայ գրող Մագդա Թախտաճյանն այցելել է Տավուշի Խաչարձան գյուղ (տեսանյութ, լուսանկարներ)
• Արգենտինահայ գրող Մագդա Թախտաճյանն այցելել է Էջմիածին (տեսանյութ)
• Մագդա Թախտաճյանն այցելել է Հայոց ցեղասպանության զոհերի հուշահամալիր (լուսանկարներ)
• Արգենտինահայ գրող Մագդա Թախտաճյանը հանդիպել է մայր բուհի իսպանախոս ուսանողների հետ (տեսանյութ, լուսանկարներ)

Ամենածանր փորձությունների միջով անցնող կանանց բանակն ամենակարևոր դասն է տալիս. կյանքում ոչինչ չի տրվում առանց պայքարի: Քուրդ կանանց դիմադրության մասին գրելիս Մագդա Թախթաճյանի մտքում ցեղասպանությունից փրկված իր տատիկներն են, որոնք զինված պայքարի որևէ շանս չեն ունեցել և փրկվել են միայն երջանիկ պատահականությամբ:

Կարդացեք նաև

• Newmag-ի հրավերով Հայաստան է ժամանում աշխարհահռչակ արգենտինահայ գրող Մագդա Թախտաճյանը
• Newmag Winter Fest 2023-ին տեղի կունենա Մագդա Թախտաճյանի «Ռոջավա» վեպի շնորհանդեսը՝ գրողի մասնակցությամբ (թրեյլերը)
• Գրող Մագդա Թախտաճյանը հանդիպել է ՀՀ-ում Արգենտինայի արտակարգ և լիազոր դեսպանին (տեսանյութ, լուսանկարներ)
• Մագդա Թախտաճյանին հյուրընկալել են Հայ բերեգործական ընդհանուր միությունում (տեսանյութ, լուսանկարներ)
• Տեղի ունեցավ Մագդա Թախտաճյանի «Ռոջավա» գրքի հեռուստաշնորհանդեսը (տեսանյութ, լուսանկարներ)