«Երբ գալիս է սեպտեմբերը». «Երազ» մանկական մատենաշարը նոր ձևաչափով բացեց գրական սեզոնն ու ներկայացրեց 5 նոր գիրք

Միջոցառումը բացեց պատանի ջութակահար և կոմպոզիտոր Վիկտորյա Ուլիխանյանը։ Նա նախ ներկայացրեց Նիկոլո Պագանինիի «Կապրիզ համար 9»-ը, այնուհետև կատարեց «Էքսպրոմտ» ստեղծագործությունը, որը գրել էր հատուկ այդ երեկոյի և «Երազ» մատենաշարի համար։

Ողջույնի խոսքով հանդես եկավ Newmag-ի ղեկավար Արտակ Ալեքսանյանը։ Նա նշեց, որ հրատարակչությունն արդեն 8 տարի գրաշուկայում է, իսկ «Երազ» մանկական մատենաշարը ստեղծվել է ավելի ուշ Newmag-ի և Yeraz Projects-ի գործակցության արդյունքում։

«Սովորաբար մենք տարվա ընթացքում երկու անգամ ենք ներկայացնում մեր մանկական նոր գրքերը՝ ուսումնական տարվա սկզբին ու ավարտին։ Այս անգամ որոշեցինք փոխել ձևաչափը ու ներկայացնելու ենք ոչ թե երեխաներին, այլ մեծերին։ 

Այստեղ են գրախանութների ու գրադարանների ներկայացուցիչները, ծնողներ ու մանկավարժներ, նախարարության ու ԿԶՆԱԿ-ի աշխատակիցներ, նրանք, ովքեր պետք է օգնեն երեխաներին ընտրել իրենց առաջին, երկրորդ և շատ կարևոր գրքերը։ 

Երբ մենք սկսում էինք մատենաշարը, ծրագրում էինք տարվա ընթացքում հրատարակել չորս գիրք։ Բայց միայն այս ամիս հինգ նոր գործ ենք ներկայացնում։ «Երազի» գրքերը նախ և առաջ առանձնանում են իրենց կենդանի լեզվով, գրագետ թարգմանությամբ։

Նրա խոսքով՝ մանկական գիրքը միայն տառեր սովորելու, կրթվելու կամ զարգանալու միջոց չէ։ Այն կարող է դառնալ երեխայի առաջին ընկերը, առաջին պատասխանը, վախը հաղթահարելու առաջին միջոցը և աշխարհի մասին պատկերացումների ձևավորման կարևոր մաս։ Այդ պատճառով երեխայի համար գիրք ընտրելը մեծ պատասխանատվություն է։

«Երազ» մատենաշարի ղեկավար Գոհար Մանուկյանն անդրադարձավ մատենաշարի ստեղծման պատմությանը և երեք տարվա ընթացքում հրատարակված շուրջ 30 մանկական ու ծնողավարման գրքերին։ Նա ընդգծեց, որ այս թվերի հետևում հեղինակների, թարգմանիչների, նկարազարդողների, խմբագիրների, սրբագրիչների և հրատարակչական թիմի մեծ աշխատանքն է։

«Երազը» միավորում է հայ և արտասահմանյան մանկագիրների ստեղծագործություններ՝ հստակ տարիքային և տեսողական համակարգով։ Մատենաշարը ստեղծելիս կարևոր են եղել ոչ միայն պատմության բովանդակությունն ու գեղարվեստական արժեքը, այլև գրքի հասանելիությունը, տառաչափը, տառատեսակը, պատկերազարդումը և երեխայի տարիքին համապատասխանությունը։

Գոհար Մանուկյանի խոսքով՝ «Երազը» պարզապես գրքերի շարք չէ, այլ մանկական գրքի նոր մշակույթ ձևավորելու փորձ։ Մատենաշարի նպատակն է, որ երեխային առաջարկվող գիրքը լինի հետաքրքիր, ճիշտ ընտրված, հասանելի և տարիքին համապատասխան։

Մատենաշարի ստեղծման գործում կարևոր դեր ունի Yeraz Projects-ի աջակցությունը։ Այդ գործակցության և ֆինանսական աջակցության շնորհիվ մանկական որակյալ գրքերը հնարավոր է պահել հնարավորինս մատչելի գնով՝ դրանք հասանելի դարձնելով ավելի շատ երեխաների։

Միջոցառման ընթացքում Newmag-ի գրական ծրագրերի ղեկավար Անի Հակոբյանը ներկայացրեց «Երազ» մատենաշարի շրջանակում հրատարակվող ծնողավարման և երեխայի զարգացման վերաբերյալ գրքերը։

«Մեր «Երազը» կիրականանար միայն մեկ դեպքում, եթե մենք գտնեինք մեկ հարցի պատասխան, ինչպե՞ս երեխային հասցնել ճիշտ գիրքը։ Որովհետև երեխայի համար գիրք ընտրելն այնքան էլ հեշտ չէ, կհամաձայնեք։ 

Պետք էր ստեղծել մի համակարգ, որը կօգնի երեխային, ծնողին, ուսուցչին կամ գրադարանավարին ավելի հեշտ կողմնորոշվել և գտնել հենց այդ երեխային համապատասխան գիրքը։ Կարճ ասած՝ պետք էր ստեղծել Երազի գիրք։ «Երազը» միայն Newmag-ի գաղափարը չէր։ Այն հնարավոր դարձավ Yeraz Projects-ի հետ գործակցության շնորհիվ»։

Անի Հակոբյանի խոսքով՝ ծնողներն ամեն օր բազմաթիվ որոշումներ են կայացնում՝ ինչպես խոսել երեխայի հետ, ինչպես սահմաններ դնել, ինչպես արձագանքել նրա վարքին։ Այդ հարցերում միայն սերը երբեմն բավարար չէ, և ծնողներին անհրաժեշտ են վստահելի աղբյուրներ, որոնց կարող են վերադառնալ հստակ իրավիճակներում։

Newmag-ը հայ ընթերցողին է ներկայացնում ծնողավարման և երեխայի զարգացման վերաբերյալ կարևոր գրքեր։ Դրանց միջոցով հրատարակչությունը փորձում է հայ ծնողներին հնարավորություն տալ մասնագիտական, լավ թարգմանած գրքերից ստանալ իրենց հարցերի պատասխանները՝ դրանք պատահական աղբյուրներում փնտրելու փոխարեն։

Երեկոյի ընթացքում Newmag-ի կորպորատիվ և միջազգային գործակցության ղեկավար Նանե Մանուկյանը ներկայացրեց «Երազ» մատենաշարի հինգ նոր գրքերը։ Հինգ տարբեր պատմություններն ու աշխարհները նախատեսված են տարբեր տարիքի երեխաների համար և շարունակում են մատենաշարի հիմնական սկզբունքը՝ երեխային առաջարկել բովանդակությամբ արժեքավոր, տեսողականորեն գրավիչ և տարիքին համապատասխան գրքեր։

Նոր հրատարակությունների ներկայացմանը հաջորդեց Newmag-ի գլխավոր խմբագիր Գնել Նալբանդյանի քննարկումը՝ «Ստիպե՞լ, թե՞ չստիպել․ սա է խնդիրը» թեմայով։

Գնել Նալբանդյանի խոսքով՝ կարևոր է հասկանալ, թե ինչ է տալիս գիրքը, որը չի տալիս էկրանը, ինչպես պարտականությունը վերածել ցանկության, ինչպես աջակցել երեխային՝ առանց ստիպելու, և ինչպես խոսել նրա կարդացած գրքի մասին՝ առանց ընթերցանությունը հարցաքննության վերածելու։

Միջոցառման մասնակիցները հնարավորություն ունեցան գնել գրքերը 40 տոկոս զեղչով։

Երեկոյի հյուրերի համար «Լուսարև» ընտանեկան գինեգործարանը կազմակերպել էր գինու հյուրասիրություն։

Կարդացեք նաև

• Newmag-ը և Yeraz Projects-ը ներկայացնում են «Այն ամենն, ինչ որդիս պիտի իմանա աշխարհի մասին». Ֆրեդրիկ Բաքմանի (թրեյլեր)
• Newmag-ն ու Yeraz Projects-ը ներկայացնում են Մեգան Մակդոնալդի հայտնի շարքը հայերեն. Ջուդի Մուդին տրամ չունի (թրեյլեր)
• Newmag-ն ու Yeraz Projects-ը «Երազ» մատենաշարով ներկայացնում են Ա․ Ֆ․ Սթեդմանի «Սկանդարը և ուրվական հեծյալը» գիրքը (թրեյլեր)
• Newmag-ն ու Yeraz Projects-ը Երազ մատենաշարով ներկայացնում են Աննա Ստարոբինեցի «Գազան դետեկտիվ» շարքի երկրորդ գիրքը (թրեյլեր)
• Newmag-ն ու Yeraz Projects-ը ներկայացնում են համաշխարհային բեսթսելլերի 4-րդ գիրքը՝ «Վտվտիկի օրագիրը. Օրեր շնիկի հետ» (թրեյլեր)