Newmag Summerfest2025-ին «Երազ» մատենաշարը կներկայացնի Ռուսլան Սաղաբալյանի «Յոթ գալակտիկաների դպրոցը» գիրքը (թրեյլեր)

Երբ դեռ չկար Հարի Փոթերի Հոգվարդսը, արդեն գոյություն ուներ այլ դպրոց՝ լի անսովոր, բացառիկ ու ֆանտաստիկ ունակություններով աշակերտներով։ Այդ դպրոցում սովորում են յոթ տարբեր գալակտիկաների սաներ։ 

Գրքի հերոսը հայտնվում է տիեզերական դպրոցում, որտեղ սովորում են տարբեր արարածներ՝ օժտված բացառիկ ունակություններով: Նրանք ոչ միայն կարողանում են կիրառել իրենց զարմանահրաշ ունակությունները, այլև յուրացնում են աստղանավերի կառավարման արվեստը, գլուխ հանում տիեզերական օրենքներից և պատրաստվում միջգալակտիկական ճամփորդությունների։

Յոթ գալակտիկաների դպրոցի աշակերտներն ընկերանում են և օգնում միմյանց դժվար իրավիճակներից դուրս գալու համար: Բայց ահա մի օր տեղի է ունենում անհավանական բան՝ դպրոցն անհետանում է: Եվ սկսվում են տարօրինակ սաների տիեզերական, միջգալակտիկական փնտրտուքները:

Աշակերտները ճամփորդում են գալակտիկաների միջև, բախվում հնադարյան առասպելներում նկարագրված էակների հետ և լուծում այնպիսի առաջադրանքներ, որոնք կարող են փոխել ամբողջ տիեզերքի ճակատագիրը: Նրանց արկածները մշտապես լի են անհավատալի իրավիճակներով, և ամեն անգամ նրանք հաղթահարում են արգելքները՝ խելամտության, համառության, հավատարմության, երևակայության և երազելու շնորհիվ: 

Զարմանահրաշ աշխարհի մասին պատմող «Յոթ գալակտիկաների դպրոցը» գրքի հեղինակը ֆանտաստ գրող Ռուսլան Սաղաբալյանն է: Նա արձակագիր է, դրամատուրգ և լրագրող: Ունի բազմաժանր ստեղծագործական ժառանգություն՝ գիտաֆանտաստիկ գրականություն, դրամատուրգիա, ֆիլմերի, մուլտֆիլմերի և վավերագրական ֆիլմերի սցենարական աշխատանքներ: Հայաստանի և Մոսկվայի Գրողների միության անդամ է, ավելի քան 2000 հրապարակումների հեղինակ: Ռուսլան Սաղաբալյանի ստեղծագործությունները թարգմանվել են 15 լեզվով:

«Յոթ գալակտիկաների դպրոցը» գիրքը նախատեսված է 9-ից բարձր տարիքի երեխաների համար։ Գրական գործը ռուսերենից Հայերեն է թարգմանել Հայկ Հարությունյանը:

Այս արտասովոր արկածներով և տիեզերական երևակայությամբ գիրքն ունի ուսուցողական ուղերձներ՝ ընթերցողին սովորեցնում է ընկերասիրություն, խելամտություն։ Գիրքը ցույց է տալիս, որ ֆանտազիան և իրականությունը կարող են հանդիպել՝ ամենաանսպասելի արկածներով։

ԾԱՆՈԹԱՆԱԼ Newmag Summerfest2025-Ի ԾՐԱԳՐԻՆ

«Յոթ գալակտիկաների դպրոցը» գրքի գլխավոր գործընկերը Yeraz Projectsn է։ Շնորհանդեսը տեղի կունենա Newmag-ի ամառային փառատոնին՝ հունիսի 21-ին, 17:10-ին։ Երեխաների հետ հանդիպմանը ներկա կլինի նաև հեղինակը՝ Ռուսլան Սաղաբալյանը։

Կարդացեք նաև

• ԳԻՐ, ԳԻՆԻ, ՋԱԶ / Newmag Summerfest2025-ը կանցկացվի երկու օր ու գիշեր՝ նոր ու անսպասելի կոնցեպտով (թիզեր)
• Newmag Summerfest2025-ի մեկնարկը կազդարարի «Երազի գիրք» մանկապատանեկան փառատոնը (տեսանյութ, լուսանկարներ)
• «Պոետն ու հոտը». գիրք, որը կուղեկցի ձեզ դեպի բույրերի զարմանահրաշ աշխարհ (թրեյլեր)
• Newmag Summerfest2025-ին տեղի կունենա Առնոլդ Շվարցենեգերի «Օգտակար եղիր։ Կյանքի 7 կանոնները» գիրքը (թրեյլեր)
• Newmag summerfest-ին Երազ մատենաշարը կներկայացնի «Կատեն ուզում էր պապիկ դառնալ» պատկերագիրքը (թրեյլեր)
• Newmag Summerfest-ին «Երազ» մատենաշարը կներկայացնի Փոլ Մակքարտնիի «Հե՛յ, պապիկ» գիրքը (թրեյլեր)
• Newmag Summerfest2025-ին տեղի կունենա Ֆրեդրիկ Բաքմանի «Բրիտ-Մարին գալիս է քաղաք» գրքի շնորհանդեսը (թրեյլեր)
• Newmag Summerfest2025-ին Երազ մատենաշարը կներկայացնի Սերենելա Կուարելոյի, Ալեսիո Ալչինիի «Անհետագիտարան» գիրքը (թրեյլեր)